وزیراعلیٰ پنجاب مریم نواز نے پیٹرولیم مصنوعات کی قیمتوں میں حالیہ کمی کا خیرمقدم کرتے ہوئے متعلقہ اداروں کو ہدایت کی ہے کہ اس کے ثمرات فوری طور پر عوام تک منتقل کیے جائیں۔
انہوں نے صوبے بھر میں ٹرانسپورٹ اور گڈز ٹرانسپورٹ کے کرایوں میں کمی کے لیے بلا تاخیر اقدامات کرنے کا حکم بھی دیا۔
مریم نواز کا کہنا تھا کہ پیٹرولیم مصنوعات کی قیمتوں میں ہونے والی کمی کا بھرپور فائدہ عوام کو ملنا چاہیے اور اس ضمن میں کسی قسم کی غفلت برداشت نہیں کی جائے گی۔
انہوں نے متعلقہ حکام کو ہدایت کی کہ کرایوں میں کمی کے فیصلے پر فوری عملدرآمد یقینی بنایا جائے۔
وزیراعلیٰ پنجاب نے پیٹرولیم مصنوعات کے نرخ کم کرنے پر وزیراعظم محمد شہباز شریف اور ان کی معاشی ٹیم کی تعریف کرتے ہوئے کہا کہ وزیراعظم نے علاقائی حالات میں بہتری آنے کے بعد عوام سے کیا گیا وعدہ پورا کر دکھایا۔
مریم نواز نے کہاکہ خطے کی غیر یقینی صورتحال کے باوجود قوم کو توانائی کے بحران سے محفوظ رکھنا وزیراعظم شہباز شریف کا ایک تاریخی کارنامہ ہے۔
انہوں نے مزید کہاکہ وزیراعظم شہباز شریف اور فیلڈ مارشل سید عاصم منیر نے مشکل حالات میں بروقت اور مؤثر اقدامات کرتے ہوئے نہ صرف پاکستان بلکہ دنیا کو بھی توانائی اور معاشی بحران سے بچانے کے لیے تاریخ ساز کردار ادا کیا ہے۔
واضح رہے کہ حکومت نے گزشتہ روز پیٹرول کی قیمت میں 74 روپے جبکہ ڈیزل کی قیمت میں 67 روپے کمی کی منظوری دی تھی۔
