خیبرپختونخوا میں سینیٹ الیکشن سے قبل پاکستان تحریکِ انصاف (پی ٹی آئی) کے کورنگ امیدوار وقاص اورکزئی نے انتخابات سے دستبرداری کا اعلان کر دیا۔
الیکشن سے ایک روز قبل وقاص اورکزئی نے وزیراعلیٰ علی امین گنڈاپور کی موجودگی میں سینیٹ الیکشن میں حصہ لینے سے دستبرداری کا اعلان کرتے ہوئے کہاکہ جہاں عمران خان کی بات ہو، وہاں میرے لیے کوئی چیز معنی نہیں رکھتی، تاہم اس کا مطلب یہ نہیں کہ میں کسی دباؤ میں یہ فیصلہ کر رہا ہوں۔
یہ بھی پڑھیں: خیبرپختونخوا اسمبلی میں مخصوص نشستوں پر منتخب ارکان نے حلف اٹھا لیا
پی ٹی آئی کے ناراض سینیٹ امیدوار وقاص اورکزئی سینیٹ انتخابات سے دستبردار، کاغذات نامزدگی واپس pic.twitter.com/DTKxNCx4iV
— WE News (@WENewsPk) July 20, 2025
وزیراعلیٰ نے اس موقع پر کہاکہ ہمیں فخر ہے کہ پی ٹی آئی ورکرز نے ہمیشہ عمران خان کا نظریہ مقدم رکھا ہے۔ وقاص اورکزئی نے ایک بار پھر ذاتی مفاد پر بانی کے حکم اور پارٹی کے مفاد کو ترجیح دی اور ہماری درخواست پر سینیٹ کی نشست سے کاغذات واپس لینے پر آمادگی ظاہر کی۔
علی امین گنڈاپور نے مزید کہاکہ میں پوری پارٹی کو یہ پیغام دینا چاہتا ہوں کہ ہمارے لیے عمران خان کا حکم اور پارٹی کا مفاد اولین ترجیح ہے، باقی چیزیں بعد میں آتی ہیں۔
واضح رہے کہ آج خیبرپختونخوا اسمبلی میں مخصوص نشستوں پر منتخب اراکین اسمبلی نے حلف اٹھا لیا ہے جس کے بعد کل سینیٹ انتخابات ہوں گے، تاہم وزیراعلیٰ علی امین گنڈاپور نے گورنر ہاؤس میں حلف برداری کو چیلنج کرنے کا اعلان کردیا ہے۔
ایڈووکیٹ جنرل شاہ فیصل اتمانخیل نے نجی ٹی وی سے گفتگو کرتے ہوئے کہا کہ مخصوص نشستوں پر ارکان کے گورنر ہاؤس میں حلف کو چیلنج کیا جا رہا ہے، اس سلسلے میں وزیراعلیٰ کی ہدایت پر کل پشاور ہائیکورٹ میں درخواست دائر کی جائے گی۔
یہ بھی پڑھیں: گورنر ہاؤس میں اراکین اسمبلی کی حلف برداری خلاف آئین ہے، علی امین گنڈاپور کا چیلنج کرنے کا اعلان
انہوں نے کہا کہ آئین کا آرٹیکل 65 ممبران اسمبلی سے حلف لینے کے لیے اسمبلی ہاؤس کی بات کرتا ہے، جبکہ اسپیکر نے ممبران سے حلف لینے سے انکار نہیں کیا بلکہ کورم پورا نہ ہونے پر اجلاس ملتوی کیا۔
