سماجی کارکن رمضان چھیپا کی ایک ویڈیو سوشل میڈیا پر وائرل ہو رہی ہے جس میں دکھایا گیا ہے کہ ایک بیوی اپنے شوہر سے ناراض ہو کر میکے آ جاتی ہے جس کے بعد اس کا شوہر اپنی والدہ کو ساتھ لے کر بیوی کو منانے جاتا ہے، لیکن وہ راضی نہیں ہوتی اور لڑکی کے والدین انہیں گھر سے نکال دیتے ہیں۔
ویڈیو میں دکھایا گیا ہے کہ خاتون کا شوہر اپنی والدہ کے ہمراہ واپس جارہا ہوتا ہے تو راستے میں اسے رمضان چھیپا مل جاتے ہیں اور ان کے ساتھ لڑکی کے گھر جا کر اُسے واپس سسرال جانے کا کہتے ہیں۔ رمضان چھیپا کی بات پر خاتون فوراً راضی بھی ہو جاتی ہے۔
ان کی ویڈیو سوشل میڈیا پر وائرل ہوئی تو ماڈل و اداکارہ نادیہ حسین نے تبصرہ کرتے ہوئے کہا ہے کہ ویڈیوز بنانا بند کر دیں۔ انہوں نے کہا کہ براہِ کرم رمضان چھیپا مجھے بطور کونٹینٹ کریئٹر رکھ لیں کیونکہ ہمیں آپ کی بےکار ویڈیوز نہیں دیکھنی۔
View this post on Instagram
کئی صارفین نے رمضان چھیپا کو تنقید کا نشانہ بناتے ہوئے کہا کہ ہمیں بھی آپ کی فضول ایکٹنگ نہیں دیکھنی، ایک صارف نے لکھا کہ آپ کس لائن میں آ گئے ہیں جبکہ کئی صارفین ان کا موازنہ ایدھی صاحب سے کرتے نظر آئے کہ آپ ان جیسے نہیں بن سکتے۔
واضح رہے کہ اس سے قبل بھی رمضان چھیپا کی ایک ویڈیو وائرل ہوئی تھی جس میں انہیں ایک بچے کی سالگرہ کے موقع پر کیک کے چند روپے دیتے ہوئے دکاندار سے کہا تھا کہ بچے کو وہی کیک دیں جو وہ چاہتا ہے، اس کی باقی قیمت وہ ادا کر دیں گے، کیک پر یہ بھی لکھ دیجیے گا کہ یہ چھیپا صاحب کی طرف سے سالگرہ کا تحفہ ہے۔
اس کے بعد انہوں نے مزید کہا تھا کہ لیکن انہیں میرے بارے میں ہرگز نہ بتائیے گا، سوشل میڈیا صارفین نے انہیں شدید تنقید کا نشانہ بنایا کہ جب منع کر دیا کہ آپ کا نہیں بتانا تو کیک پر چھیپا کیوں لکھوایا۔
