پاکستان کے تمام بڑے بین الاقوامی ہوائی اڈوں پر غیر ملکی مسافروں کے لیے علیحدہ امیگریشن کاؤنٹرز قائم کر دیے گئے۔
یہ بھی پڑھیں: ایک اور پاکستانی ایئرلائن برطانیہ کے لیے اُڑان بھرنے کو تیار
فیڈرل انویسٹی گیشن ایجنسی (ایف آئی اے) کے ترجمان کے مطابق وزیراعظم شہباز شریف کی خصوصی ہدایت پر ملک کے امیگریشن نظام کو جدید اور مؤثر بنانے کے لیے عملی اقدامات کا آغاز کر دیا گیا ہے جن میں علیحدہ کاؤنٹرز کا قیام بھی شامل ہے جس مقصد غیر ملکی مسافروں کو امیگریشن کلیئرنس کے دوران غیر ضروری تاخیر سے بچانا ہے۔
ترجمان نے بتایا کہ یہ نئے خصوصی امیگریشن کاؤنٹرز کراچی، لاہور، اسلام آباد، پشاور، ملتان اور سیالکوٹ ایئرپورٹس پر فعال کر دیے گئے ہیں۔
ایف آئی اے ترجمان کا کہنا ہے کہ ان اقدامات کا مقصد پاکستان میں سیاحت، تجارت اور غیر ملکی سرمایہ کاری کو فروغ دینا ہے تاکہ بیرون ملک سے آنے والے سیاحوں، سرمایہ کاروں اور کاروباری وفود کو ایک خوشگوار اور آسان تجربہ فراہم کیا جا سکے۔
مزید پڑھیے: ایف آئی اے کی کراچی ایئرپورٹ پر کارروائیاں، 3 ملزمان گرفتار
ترجمان نے مزید کہا کہ وطن واپس آنے والے پاکستانیوں کے لیے بھی امیگریشن کا عمل مزید تیز اور سہل بنا دیا گیا ہے اور تمام بین الاقوامی ہوائی اڈوں پر امیگریشن خدمات کو بین الاقوامی معیار کے مطابق بہتر بنانے کے لیے کوششیں جاری ہیں۔
ایف آئی اے کا کہنا ہے کہ یہ تمام اقدامات وزیراعظم کی ہدایت پر بروقت اور منظم طریقے سے نافذ کیے جا رہے ہیں تاکہ پاکستان کا امیج دنیا میں ایک مہذب، منظم اور سیاح دوست ملک کے طور پر ابھرے۔
