لاہور میں متنازع پروگرام اور غیراخلاقی فوٹو شوٹ کیخلاف مقدمہ درج، متعدد گرفتار

لاہور میں یومِ آزادی کے موقع پر فوٹو شوٹ اور ویڈیوز کی شکل میں مبینہ غیر اخلاقی تقریب سامنے آنے کے بعد پولیس نے مقدمہ درج کر کے مرکزی ملزم سمیت کئی افراد کو گرفتار کر لیا ہے۔ مزید ملزمان کی گرفتاری کے لیے چھاپے مارے جا رہے ہیں۔

یہ بھی پڑھیں:لاہور پولیس کا شہریوں کو ٹریفک قوانین کی خلاف ورزی پر انتباہ جاری

میڈیا رپورٹ کے مطابق یہ مقدمہ تھانہ نصیر آباد میں درج کیا گیا ہے جس میں جنان سندھو، رحمت ظفر، جان حسینہ اور سات نامعلوم خواجہ سراؤں کو نامزد کیا گیا ہے۔

ایف آئی آر کے متن میں کہا گیا ہے کہ گلبرگ کے ایک اسٹوڈیو میں عریاں لباس پہن کر فحش گانوں پر ویڈیوز بنائی گئیں اور انہیں سوشل میڈیا پر پھیلایا گیا۔

ڈی آئی جی آپریشنز فیصل کامران نے کہا کہ پارٹی یا فوٹو شوٹ کے نام پر فحاشی کو کسی صورت برداشت نہیں کیا جا سکتا۔

ان کے مطابق واقعے میں ملوث تمام کرداروں کو قانون کے کٹہرے میں لایا جائے گا اور اسلام و ملکی قوانین سے متصادم سرگرمیوں کے خلاف سخت کارروائی ہو گی۔

حکومت پنجاب نے واقعے کی ویڈیوز اور تصاویر سوشل میڈیا پر وائرل ہونے کے بعد فوری نوٹس لیا تھا۔

یہ بھی پڑھیں:لاہور پولیس کا عام انتخابات 2024 کے پرامن انعقاد کے لیے انٹیلیجنس بنیادوں پر سرچ آپریشن

اسی سلسلے میں لاہور پولیس نے مختلف علاقوں میں کارروائیاں کر کے 5 خواجہ سراؤں کو حراست میں لے لیا ہے۔

فیصل کامران کا مزید کہنا تھا کہ متنازع فلم جوائے لینڈ کی اسکریننگ بھی روک دی گئی ہے تاکہ کسی بھی ممنوعہ یا غیر اخلاقی سرگرمی کو فروغ نہ مل سکے۔