بلوچستان حکومت نے گلگت بلتستان اور خیبر پختونخوا کے سیلاب متاثرہ خاندانوں کے لیے امدادی سامان کی بڑی کھیپ روانہ کی ہے۔
ترجمان بلوچستان حکومت شاہد رند کے مطابق وزیر اعلیٰ بلوچستان میر سرفراز بگٹی کی خصوصی ہدایت پر یہ امدادی سامان بھیجا گیا تاکہ متاثرہ عوام کی فوری ضروریات پوری کی جا سکیں۔ امدادی کھیپ میں بنیادی ضرورت کی اشیاء اور نان فوڈ آئٹمز شامل ہیں جو متاثرہ خاندانوں میں تقسیم کی جائیں گی۔
شاہد رند کے مطابق گلگت بلتستان کے 1500 اور خیبر پختونخوا کے 1000 متاثرہ خاندانوں کے لیے سامان روانہ کیا گیا۔ اس موقع پر ترجمان حکومت اور ڈائریکٹر جنرل پی ڈی ایم اے جہانزیب خان نے امدادی سامان کو متاثرہ علاقوں کی جانب روانہ کیا۔
مزید پڑھیں: خیبر پختونخوا کے مختلف اضلاع میں سیلاب متاثرین کے لیے وزیراعلیٰ کا اہم اعلان
شاہد رند نے کہا کہ بلوچستان حکومت مشکل کی اس گھڑی میں گلگت بلتستان اور خیبر پختونخوا کے عوام کے ساتھ کھڑی ہے۔ انہوں نے کہا کہ سیلاب متاثرہ بھائیوں کی مدد انسانی ہمدردی اور یکجہتی کا عملی اظہار ہے، اور بلوچستان کے عوام اپنے وسائل اور دکھ درد متاثرہ صوبوں کے عوام کے ساتھ بانٹنے کو اپنی ذمہ داری سمجھتے ہیں۔
ڈائریکٹر جنرل پی ڈی ایم اے جہانزیب خان نے بتایا کہ بھیجا جانے والا امدادی سامان اعلیٰ معیار کا ہے اور اس میں وہ اشیاء شامل کی گئی ہیں جو متاثرہ خاندانوں کی فوری ضرورت ہیں۔ انہوں نے کہا کہ سامان کی تیاری اور ترسیل میں معیاری پیمانوں کو مدنظر رکھا گیا تاکہ متاثرین کو حقیقی سہولت میسر ہو۔
وزیر اعلیٰ بلوچستان میر سرفراز بگٹی نے اپنے پیغام میں کہا کہ سیلاب متاثرین کی ہر ممکن مدد حکومت بلوچستان کی اولین ترجیح ہے اور متاثرہ خاندانوں کو کسی صورت اکیلا نہیں چھوڑا جائے گا۔
