ترک خاتونِ اول امینہ اردوان نے امریکی صدر ڈونلڈ ٹرمپ کی اہلیہ میلانیا ٹرمپ کو خط لکھا ہے جس میں ان سے مطالبہ کیا گیا ہے کہ وہ اسرائیلی وزیراعظم سے رابطہ کرکے غزہ کے بچوں کی حالتِ زار پر آواز بلند کریں۔
ترک حکام کے مطابق یہ خط جمعے کے روز لکھا گیا جسے ترک صدراتی دفتر نے جاری کیا۔
یہ بھی پڑھیے: ’آصفہ بھٹو عکسِ بے نظیر ہیں‘، خاتون اول کے ترک صدر کی گاڑی چلانے پر صارفین کے تبصرے
امینہ اردوان نے اپنے خط میں کہا کہ انہیں میلانیا ٹرمپ کے اس خط سے حوصلہ ملا جو انہوں نے رواں ماہ کے آغاز میں روسی صدر ولادیمیر پیوٹن کو یوکرین اور روسی بچوں کے حوالے سے لکھا تھا۔
انہوں نے لکھا کہ مجھے یقین ہے کہ جس حساسیت کا اظہار آپ نے 648 یوکرینی بچوں کے لیے کیا وہی غزہ کے بچوں کے لیے بھی کریں گی۔
یہ بھی پڑھیے: ترک صدر دورہ پاکستان مکمل کر کے واپس روانہ
انہوں نے مزید کہا کہ آج جب دنیا ایک اجتماعی بیداری سے گزر رہی ہے اور فلسطین کو تسلیم کرنے کا عمل عالمی خواہش بن چکا ہے، تو میرا یقین ہے کہ غزہ کے لیے آپ کی اپیل فلسطینی عوام کے حق میں ایک تاریخی ذمہ داری کو پورا کرے گی۔
دوسری جانب اقوامِ متحدہ کے تحت عالمی بھوک مانیٹرنگ ادارے نے جمعے کے روز اعلان کیا کہ غزہ شہر اور اس کے اطراف قحط کا شکار ہیں اور یہ صورتحال مزید پھیلنے کا خدشہ ہے، جس سے اسرائیل پر زیادہ امداد کی اجازت دینے کا دباؤ بڑھ گیا ہے۔
تاہم اسرائیلی وزیراعظم نیتن یاہو نے اس رپورٹ کو ‘کھلا جھوٹ’ قرار دیا اور کہا کہ اسرائیل بھوک روکنے کی پالیسی پر عمل پیرا ہے، نہ کہ بھوک پیدا کرنے پر۔
