اسلام آباد انٹرنیشنل ایئرپورٹ پر سعودی عرب کی کم خرچ فضائی کمپنی فلائی اے ڈیل کی پہلی پرواز کا شاندار استقبال کیا گیا۔
گزشتہ اتوار کو ریاض سے آنے والا طیارہ 65 مسافروں کو لے کر اسلام آباد پہنچا، جہاں روایتی ‘واٹر سلوٹ’ کے ساتھ اس کا خیرمقدم کیا گیا۔ واپسی پر 172 مسافر اسلام آباد سے ریاض روانہ ہوئے۔
یہ بھی پڑھیے: سعودی ایئرلائن کا تقریباً ایک دہائی بعد ایرانی حجاج کے لیے پروازوں کا آغاز
سول ایوی ایشن اتھارٹی کے مطابق فلائی اے ڈیل نے پاکستان میں اپنی پروازوں کے دائرہ کار کو بڑھاتے ہوئے اسلام آباد اور پشاور کے لیے بھی سروس کا آغاز کر دیا ہے۔ پیر کے روز کمپنی کا طیارہ پشاور کے باچا خان انٹرنیشنل ایئرپورٹ بھی اترا۔
🔴 دارالحکومت اسلام آباد میں سعودی عرب کی معروف فضائی کمپنی "فلائی ادیل" کو خوش آمدید۔
گزشتہ اتوار کو "فلائی ادیل" کی پہلی پرواز اسلام آباد پہنچی، جہاں طیارے کو "واٹر سلوٹ" کے ساتھ خوش آمدید کہا گیا۔@flyadeal #پاک_سعودی_تعلقات pic.twitter.com/ezw87fRchT
— Dr. Naif Alotaibi (@Dr_Naif777) August 27, 2025
جدہ میں قائم ہیڈ آفس رکھنے والی یہ ایئرلائن سعودیہ ایئرلائنز کی سسٹر کمپنی ہے۔ فلائی اے ڈیل نے پاکستان میں اپنے آپریشنز کا آغاز رواں سال یکم فروری کو کراچی سے کیا تھا، جس کے بعد اب مزید شہروں تک پروازیں شروع کی جا رہی ہیں۔
ترجمان کے مطابق کمپنی ہر ہفتے ریاض اور پشاور کے درمیان دو پروازیں آپریٹ کرے گی جو پیر اور بدھ کے دن ہوں گی، جبکہ اتوار کو ریاض سے اسلام آباد کے لیے ایک پرواز چلائی جائے گی۔
