شمالی بلوچستان میں ایف سی کمپاؤنڈ مسلم باغ میں موجود تمام 6 دہشت گردوں کو ہلاک کر دیا گیا ہے۔ دہشت گرد جدید اسلحہ سے لیس تھے۔ ان کے روابط کا سراغ لگانے اور سہولت کاروں کو گرفتار کرنے کے لیے ضروری انٹیلی جنس فالو اپ جاری رہے گا۔
آئی ایس پی آر سے جاری اعلامیے میں کہا گیا ہے کہ کلیئرنس آپریشن کے دوران ایک شہری سمیت 7 جوانوں نے شہادت کو گلے لگایا جبکہ ایک خاتون سمیت 6 افراد زخمی ہوئے ہیں۔
دہشت گردوں کے حملے کو ناکام بنانے کے بعد 12 مئی کی شام سے شروع کیا گیا کلیئرنس آپریشن 13 مئی کی صبح مکمل کر لیا گیا۔ کلیئرنس آپریشن میں رہائشی بلاک میں یرغمال بنائے گئے 3 خاندانوں کو بھی بچایا گیا ہے۔ دہشت گردوں نے اپنے مذموم مقاصد کے لیے بچوں کو بھی نہیں بخشا۔
آئی ایس پی آر نے کہا ہے کہ سیکیورٹی فورسز قوم کے شانہ بشانہ بلوچستان کے امن، استحکام اور ترقی کو سبوتاژ کرنے کی تمام کوششوں کو ناکام بنانے کے لیے پُر عزم ہیں۔
مسلح افواج دہشت گردی کے مکمل خاتمے کے لیے پُرعزم ہیں: وزیرِاعظم شہباز شریف
وزیرِ اعظم شہباز شریف نے کہا ہے کہ مسلح افواج دہشت گردی کے مکمل خاتمے کے لیے پُرعزم ہیں اور پوری قوم سیکیورٹی فورسز کے ساتھ کھڑی ہے۔
پر یس انفارمیشن ڈیپارٹمنٹ (پی آئی ڈی) سے جاری بیان کے مطابق وزیرِ اعظم محمد شہباز شریف نے مسلم باغ، بلوچستان کے ایف سی کمپاﺅنڈ میں دہشت گردوں کے خلاف آپریشن کے دوران پاک فوج کے 6 جوانوں اور ایک شہری کی شہادت پر گہرے رنج اور دکھ کا اظہار کیا ہے۔
وزیرِاعظم نے شہداء کی بلندی درجات کی دعا اور لواحقین سے اظہار تعزیت بھی کیا۔ وزیرِاعظم نے زخمیوں کی جلد صحت یابی کی دعا کی اور انہیں ہر ممکن طبی امداد کی فراہمی کی ہدایت بھی کی۔
