سعودی عرب کا 95ویں قومی دن کے موقع پر اسلام آباد میں سعودی سفارتخاتے میں پروقار تقریب کا انعقاد کیا گیا، تقریب کے مہمان خصوصی چیئرمین سینیٹ یوسف رضا گیلانی تھے۔
تقریب سے خطاب کرتے ہوئے سعودی سفیر نواف بن سعید المالکی نے کہا کہ پاکستان اور سعودی عرب کے درمیان تاریخی، سفارتی اور مذہبی تعلقات قائم ہیں جو وقت کے ساتھ مزید مضبوط ہوئے ہیں۔
یہ بھی پڑھیں: پاک سعودی تعلقات ہمیشہ قائم و دائم رہیں گے، وزیراعظم کا سعودی عرب کے قومی دن پر پیغام
انہوں نے کہا کہ اس پرمسرت موقع پر شاہ سلمان بن عبدالعزیز اور ولی عہد شہزادہ محمد بن سلمان کی جانب سے عہد کیا جاتا ہے کہ سعودی عرب ہر حال میں پاکستان کے ساتھ کھڑا رہے گا۔
تقریب کے مہمانِ خصوصی چیئرمین سینیٹ یوسف رضا گیلانی نے کہا کہ سعودی عرب کے 95 ویں قومی دن پر صدر آصف علی زرداری، حکومت اور عوام کی جانب سے شاہ سلمان، ولی عہد اور سعودی عوام کو دلی مبارکباد پیش کرتا ہوں۔
انہوں نے کہا کہ پاکستان اور سعودی عرب کے درمیان مذہبی اور ثقافتی رشتے ہیں، ہر پاکستانی سعودی عرب کے ساتھ خصوصی تعلق محسوس کرتا ہے کیونکہ یہ حرمین الشریفین کی سرزمین ہے۔
یہ بھی پڑھیں: سعودی عرب کے قومی دن پر سینیٹر طلحہ محمود کا پیغام
چیئرمین سینیٹ نے کہا کہ دونوں ممالک کے درمیان حالیہ دفاعی معاہدہ ایک سنگ میل کی حیثیت رکھتا ہے، سعودی عرب کی حفاظت پاکستان کے لیے ایک مقدس فریضہ ہے اور ہم سعودی عرب کی سالمیت اور خودمختاری کی ہر طرح سے حفاظت کریں گے۔
انہوں نے کہا کہ بڑھتے ہوئے خطرات کے ماحول میں مسلم امہ کو اکٹھا ہونے کی ضرورت ہے، اسلاموفوبیا اور دیگر چیلنجز صرف ایک ملک نہیں بلکہ پوری امت کو درپیش ہیں۔
یوسف رضا گیلانی نے مزید کہا کہ پاکستان اور سعودی عرب کا تعلق صرف دفاعی نہیں بلکہ معاشی شعبے میں بھی فروغ پا رہا ہے۔ سعودی عرب میں موجود پاکستانی کمیونٹی دونوں ممالک کے درمیان ایک پل کا کردار ادا کر رہی ہے۔ انہوں نے کہا کہ ایمان، یقین اور برادرانہ تعلقات دونوں ملکوں کو ہمیشہ جوڑے رکھیں گے۔
