لاہور ہائیکورٹ نے چیئرمین تحریک انصاف عمران خان کی تقاریر کو براہ راست دکھانے کی پابندی پر پیمرا کے خلاف توہین عدالت کی درخواست پر الیکٹرانک میڈیا کے ضابطہ اخلاق کی کاپی درخواست کے ساتھ لف کرنے کی ہدایت کر دی۔
لاہور ہائیکورٹ میں چیئرمین تحریک انصاف عمران خان کی تقاریر پر پابندی پر پیمرا کے خلاف توہین عدالت کی درخواست کی سماعت جسٹس شمس محمود مرزا نے کی۔
عمران خان کے وکیل بیرسٹر احمد پنسوتھا نے دائر درخواست میں مؤقف اختیار کیا ہے کہ قانونی طور پر سیاسی جماعتوں کو برابری کے اصول پر ایئر ٹائم ملنا قانونی تقاضا ہے۔ لاہور ہاٸیکورٹ نے عمران خان کی تقاریر نشر کرنے پر پابندی کا نوٹیفیکشن معطل کر دیا تھا۔ عدالت نے پیمرا کو ہدایت کی تھی کہ عمران خان کی تقاریر نشر کرنے پر کوٸی پابندی نہ لگاٸی جاٸے۔
بیرسٹر احمد پنسوتھا کے مطابق عدالتی احکامات کے باوجود عمران خان کی تقاریر نشر کیے جانے سے روکا جا رہا ہے۔ عدالتی حکم کی خلاف ورزی توہین عدالت ہے۔
درخواست میں عدالت سے استدعا کی گئی ہے کہ عدالت عمران خان کی تقاریر کی نشریات پرعائد پابندی ختم کرنے کے عدالتی فیصلے پر عمل درآمد کرائے اور ذمہ دار افسران کے خلاف توہین عدالت کی کاررواٸی کرے۔
عدالت نے درخواست گزار کو الیکٹرانک میڈیا کے ضابطہ اخلاق کی کاپی پٹیشن کے ہمراہ لف کرنے کی ہدایت کرتے ہوئے کیس کی سماعت 27 مئی تک ملتوی کر دی۔
