پاکستان میں آئی فون 16 پرو استعمال کرنے والے صارفین اپنا فون پاکستان ٹیلی کمیونیکیشن اتھارٹی (پی ٹی اے) سے رجسٹرڈ کرانے کے لیے بھاری رقم ایک ساتھ ادا کرنے کے بجائے آسان ماہانہ قسطوں میں ٹیکس ادا کر سکیں گے۔
بینک الفلاح کی جانب سے یہ سہولت بغیر سود (0% انٹرسٹ) کے متعارف کرائی گئی ہے تاکہ صارفین باآسانی اپنے موبائل فون کو رجسٹرڈ کروا سکیں۔
بینک الفلاح کی ’الفا‘ ایپ کے ذریعے صارفین اب آئی فون 16 پرو کے پی ٹی اے ٹیکس کو مرحلہ وار ادا کر سکتے ہیں۔ یہ سہولت صرف بینک الفلاح کریڈٹ کارڈ ہولڈرز کے لیے دستیاب ہے۔
مزید پڑھیں: آئی فون 17 کی وہ 7 خصوصیات کیا ہیں جن سے اس نے آئی فون 16 کو مات دی؟
قسطوں کی تفصیل کے مطابق 36 ماہ کے پلان میں ماہانہ قسط 7,443 روپے، 24 ماہ کے لیے 9,602 روپے، 12 ماہ کے لیے 16,116 روپے، جبکہ 9 ماہ کے لیے 20,467 روپے مقرر کی گئی ہے۔
اسی طرح، 6 ماہ کے لیے 26,116 روپے اور 3 ماہ کے لیے 52,233 روپے کی قسط رکھی گئی ہے، جن پر کوئی سود لاگو نہیں ہوگا۔ تاہم 0 فیصد مارک اپ والے پلان پر 5 فیصد پراسیسنگ فیس وصول کی جائے گی۔
صارفین اس سہولت سے استفادے کے لیے ’الفا مال‘ کی ویب سائٹ یا ایپ پر جا کر اپنے فون کا IMEI نمبر، نام اور شناختی کارڈ نمبر (CNIC) درج کر سکتے ہیں۔ اس کے بعد Buy Now, Pay Later یعنی ’اب خریدیں، بعد میں ادائیگی کریں‘ کے آپشن کے ذریعے قسطوں کا منصوبہ منتخب کیا جا سکتا ہے۔
مزید پڑھیں: آئی فون 17 لینے والوں کو بڑا دھچکا، کمپنی نے خرابی تسلیم کرلی
یاد رہے کہ آئی فون 16 پرو میں 6.3 انچ سپر ریٹینا XDR OLED ڈسپلے، Apple A18 Pro چپ، 8 جی بی ریم، 1 ٹی بی تک اسٹوریج، 48 میگا پکسل کیمرہ سیٹ اپ اور iOS 18 شامل ہیں۔
ٹیکنالوجی ماہرین کے مطابق یہ اقدام مہنگے اسمارٹ فونز کے شوقین صارفین کے لیے سہولت پیدا کرے گا اور قانونی طریقے سے پی ٹی اے رجسٹریشن کے رجحان میں اضافہ متوقع ہے۔
