جیکب آباد کی سیشن عدالت نے سابق وفاقی وزیر علی زیدی کو جیل میں بی کلاس کی سہولیات فراہم کرنے کا حکم دیا ہے۔
سیشن عدالت نے سپرنٹینڈنٹ جیل کو احکامات دیے ہیں کہ علی زیدی کو جیل میں بنیادی سہولیات کی فراہمی یقینی بنائی جائے۔
عدالت نے احکامات دیے ہیں کہ ایم پی او کے تحت زیر حراست علی زیدی کو ادویات کی فراہمی یقینی بنائی جائے۔
اس کے علاوہ علی زیدی کو وکلا اور رشتے داروں کے ساتھ ملاقات کی بھی اجازت دے دی گئی ہے۔
عدالتی احکامات کے باوجود علی زیدی کو سہولیات نہیں دی جا رہیں: ترجمان پی ٹی آئی سندھ
دوسری جانب تحریک انصاف سندھ کے ترجمان نے کہا ہے کہ عدالتی احکامات کے باوجود علی زیدی کو بنیادی سہولیات فراہم نہیں کی جارہی۔
ترجمان نے کہا ہے کہ علی زیدی کو 3 دن سے کچھ کھانے کو نہیں دیا جارہا۔ اس کے علاوہ اہل خانہ اور وکلا تک بھی رسائی نہیں ہے۔
ترجمان نے کہا کہ علی زیدی کی طبیعت ناساز ہے۔ انھیں ادویات کی فراہمی ناگزیر ہے مگر سیاسی قیدیوں کے ساتھ ناروا سلوک سندھ حکومت کا وطیرہ ہے۔
ترجمان نے کہا کہ عدالت سے درخواست کریں گے کہ علی زیدی کے ساتھ ہونے والے سلوک پر نوٹس لیں۔ عدالتی احکامات کی پیروی نہ کرنے پر سپرنٹینڈنٹ جیل جیکب آباد کو معطل کیا جانا چاہیے۔
ترجمان کے مطابق ہم نے پہلے بھی خدشہ ظاہر کیا تھا کہ جیکب آباد جیل میں علی زیدی کی جان کو خطرہ ہے۔ اگر دوران حراست ان کو کچھ ہوا تو اس کی ذمہ داری سندھ حکومت پر عائد ہوگی۔
انہوں نے انسانی حقوق کی تنظیموں سے اپیل ہے کہ علی زیدی کے ساتھ ہونے والے غیر انسانی سلوک پر آواز اٹھائیں۔
