متحدہ قومی موومنٹ (ایم کیو ایم) کے بانی مقتول رہنما ڈاکٹر عمران فاروق کی اہلیہ شمائلہ عمران فاروق لندن میں انتقال کر گئی ہیں۔
میڈیا رپورٹس کے مطابق وہ کینسر میں مبتلا تھیں اور لندن کے ایک اسپتال میں زیرِ علاج تھیں۔
شہیدانقلاب ڈاکٹرعمران فاروق شہید کی بیوہ شمائلہ عمران فاروق آج انتقال فرماگئی ہیں ۔ اناللہ واناالیہ راجعون
🖤🖤🖤🖤🖤🖤🖤🖤🖤🖤لندن…19دسمبر2025ئ
ہم انتہائی افسوس کے ساتھ تحریک کے تمام کارکنان اورعوام کویہ خبردے رہے ہیں کہ شہید انقلاب ڈاکٹرعمران فاروق شہید کی بیوہ شمائلہ عمران… pic.twitter.com/nhpvwTVLLX— MQM (@OfficialMQM) December 19, 2025
شمائلہ عمران فاروق کو اپنے شوہر ڈاکٹر عمران فاروق کے برطانیہ میں بہیمانہ قتل کے قریباً 11 برس بعد، 18 ستمبر 2021 کو لندن کے ایک اسپتال میں داخل کرایا گیا تھا۔
اس سے قبل میڈیا رپورٹس میں بتایا گیا تھا کہ وہ بولنے کے قابل نہیں رہیں، ان کے بائیں کان کی سماعت متاثر ہو چکی تھی اور نظامِ ہاضمہ بھی شدید مسائل کا شکار تھا۔
2020 میں پاکستان کی ایک عدالت نے ڈاکٹر عمران فاروق کے قتل کیس میں ایم کیو ایم کے 3 کارکنان خالد شمیم، محسن علی اور معظم علی کو عمر قید کی سزا سنائی، جس کے بعد اسکاٹ لینڈ یارڈ نے اپنی فائل بند کر دی۔ تاہم اس عدالتی فیصلے کے باوجود شمائلہ عمران فاروق اور ان کے بچوں کی مشکلات میں کوئی کمی نہ آ سکی۔
شمائلہ عمران فاروق چوتھے مرحلے کے کینسر سمیت متعدد بیماریوں میں مبتلا تھیں، جبکہ 16 ستمبر 2010 کو لندن میں اپنے شوہر کے قتل کا صدمہ بھی ان کی صحت پر گہرے اثرات چھوڑ گیا تھا۔
واضح رہے کہ 50 سالہ ڈاکٹر عمران فاروق کو 16 ستمبر 2010 کو لندن میں ان کی رہائش گاہ کے باہر قتل کیا گیا تھا۔ ان کے قتل کا مقدمہ پاکستان میں بھی زیرِ سماعت رہا، جبکہ برطانیہ میں اسکاٹ لینڈ یارڈ اب تک مرکزی ملزمان تک پہنچنے میں ناکام رہی۔
ایف آئی اے نے 2015 میں اس قتل کے سلسلے میں ایم کیو ایم کی اعلیٰ قیادت سمیت متعدد افراد کے خلاف مقدمہ درج کیا تھا، جبکہ ایک ملزم کاشف خان کامران کے انتقال کی بھی اطلاعات سامنے آ چکی ہیں۔
