بھارت میں نیوکلیئر اور ریڈیواکٹو مواد سے متعلق پیش آنے والے متعدد واقعات اب محض انفرادی غفلت نہیں رہے، بلکہ ایک ایسے تسلسل کی صورت اختیار کر چکے ہیں جو ریاستی نگرانی، انوینٹری مینجمنٹ اور فضلے کے تصرف کے پورے نظام پر سوالیہ نشان بن چکا ہے۔ گزشتہ کئی برسوں میں حساس ریڈیواکٹو مواد کا غیر مجاز طور پر اسکریپ مارکیٹ تک پہنچ جانا اس بات کی نشاندہی کرتا ہے کہ حفاظتی فریم ورک اور عملی نفاذ کے درمیان واضح خلا موجود ہے۔
یہ بھی پڑھیے پاکستان خطرناک جوہری مواد کی حفاظت میں بھارت سےبہتر، امریکی جائزہ رپورٹ
2010 میں دہلی کے علاقے مایاپوری میں کوبالٹ-60 کے ایک ریڈیواکٹو سورس کا اسکریپ میں فروخت ہونا ایک بڑا واقعہ تھا، جس کے نتیجے میں متعدد افراد متاثر ہوئے اور ایک شخص کی ہلاکت بھی رپورٹ ہوئی۔ اس واقعے نے نہ صرف ادارہ جاتی غفلت کو بے نقاب کیا بلکہ نیوکلیئر فضلے کے انتظام کے نظام کو بھی کڑی تنقید کا نشانہ بنایا۔
اسی طرح 2019 میں آندھرا پردیش میں سیزیم-137 کا ایک لاپتہ سورس ایک اسکریپ ڈیلر کے پاس سے برآمد ہوا، جو اس بات کی علامت تھا کہ حساس مواد کی ٹریکنگ اور انوینٹری مینجمنٹ مؤثر نہیں۔ بین الاقوامی سطح پر، انٹرنیشنل اٹامک انرجی ایجنسی (IAEA) کے واقعاتی ریکارڈ میں بھی بھارت سے متعلق متعدد رپورٹس درج ہیں، جو ان مسائل کے تسلسل کی نشاندہی کرتی ہیں۔
یہ بھی پڑھیے بھارت میں گینگ سے تابکاری مواد کی برآمدگی پر پاکستان کا ردعمل کیا رہا؟
ماہرین کے مطابق مسئلہ قوانین کی عدم موجودگی نہیں بلکہ ان پر غیر مستقل عملدرآمد ہے، جس کے باعث ایسے واقعات اکثر اتفاقیہ دریافت ہوتے ہیں، نہ کہ بروقت نگرانی کے نتیجے میں۔
