صدر مملکت آصف علی زرداری اور وزیراعظم شہباز شریف نے خیبر پختونخوا کے ضلع باجوڑ کے علاقے خار میں فتنہ الخوارج کے خلاف کامیاب انٹیلی جنس بیسڈ آپریشن پر سیکیورٹی فورسز کو خراجِ تحسین کیا ہے۔
صدر مملکت آصف زرداری نے کہاکہ آپریشن کے دوران بھارتی پراکسی فتنہ الخوارج سے تعلق رکھنے والے 5 دہشت گردوں کو ہلاک کرنے پر فورسز کی پیشہ ورانہ مہارت قابلِ تحسین ہے۔
مزید پڑھیں: باجوڑ: سیکیورٹی فورسز نے بھارتی حمایت یافتہ 5 دہشتگرد ہلاک کردیے، فائرنگ کے تبادلے میں میجر شہید
صدرِ مملکت نے شہید میجر عدیل زمان کے اہلِ خانہ سے دلی تعزیت اور صبرِ جمیل کی دعا کی۔
انہوں نے کہاکہ میجر عدیل زمان کی جرأت اور وطن کے لیے عظیم قربانی پوری قوم کے لیے باعثِ فخر ہے، ایکشن پلان اور عزمِ استحکام کے تحت دہشتگردی کے خلاف کارروائیاں پوری قوت سے جاری رہیں گی۔
دوسری جانب وزیراعظم شہباز شریف نے کہاکہ آپریشن عزم واستحکام کے تحت سیکیورٹی فورسز دہشت گردی کے خلاف کامیابیاں حاصل کر رہی ہیں۔
ان کا کہنا تھا کہ پوری قوم دہشتگردی کے خلاف اس جنگ میں پاکستان کی افواج کے ساتھ کھڑی ہے، ملک کو ہر قسم کی دہشت گردی سے پاک کریں گے۔
وزیراعظم نے شہید ہونے والے میجر عدیل زمان کے درجات بلندی کے لیے دعا کرتے ہوئے ان کے اہل خانہ سے تعزیت کا اظہار کیا۔
مزید پڑھیں: بھارت کی ریاستی سرپرستی میں ہونے والی دہشتگردی عالمی امن کے لیے سنگین خطرہ
واضح رہے کہ سیکیورٹی سیکیورٹی فورسز نے خیبرپختونخوا کے ضلع باجوڑ میں کارروائی کرتے ہوئے بھارتی حمایت یافتہ فتنہ الخوارج کے 5 دہشتگردوں کو ہلاک کردیا، جبکہ فائرنگ کے تبادلے میں پاک فوج کے میجر عدیل زمان شہید ہوگئے۔
