پنجاب بھر کے تعلیمی اداروں میں سردیوں کی چھٹیوں میں اضافہ کر دیا گیا ہے۔ وزیر تعلیم پنجاب رانا سکندر حیات کے مطابق اسکول اب 19 جنوری 2026 سے دوبارہ کھولے جائیں گے۔
مزید پڑھیں: خیبر پختونخوا کے ضلع ہری پور میں 3 چھٹیوں کا اعلان، تمام سرکاری و نجی اسکول بند رہیں گے
وزیر تعلیم نے بتایا کہ یہ فیصلہ مشاورت کے بعد کیا گیا ہے اور صوبے کے تمام تعلیمی اداروں پر لاگو ہوگا۔ انہوں نے والدین اور طلبہ سے اپیل کی کہ نئے شیڈول کے مطابق تعلیمی سرگرمیوں کی تیاری کریں۔
یاد رہے کہ گزشتہ روز ہی پنجاب حکومت نے واضح کیا تھا کہ اسکولوں اور کالجز کی سردیوں کی تعطیلات میں کوئی اضافہ نہیں کیا جائے گا۔ اس حوالے سے وزیر تعلیم رانا سکندر ہمایوں کا کہنا تھا کہ تمام تعلیمی ادارے 12 جنوری 2026 کو شیڈول کے مطابق دوبارہ کھلیں گے اور سوشل میڈیا پر گردش کرنے والی جعلی خبروں سے گریز کیا جائے۔
Schools & Colleges will Open on The 12th of January Inshallah.
Pls Avoid Fake News 🙏— Rana Sikandar Hayat (@RanaSikandarH) January 9, 2026
وزیر تعلیم رانا سکندر ہمایوں نے اپنے ٹوئٹ میں لکھا کہ ’اسکول اور کالجز 12 جنوری کو کھلیں گے انشاء اللہ۔ براہ کرم جعلی خبروں سے گریز کریں۔‘ انہوں نے والدین، طلبہ اور اساتذہ سے درخواست کی کہ وہ غیر تصدیق شدہ معلومات شیئر نہ کریں اور صرف سرکاری اعلان پر بھروسہ کریں۔
پنجاب ایجوکیشن ڈیپارٹمنٹ نے پہلے ہی سرکاری اور نجی اسکولوں کی تعطیلات 22 دسمبر 2025 سے 10 جنوری 2026 تک مقرر کر دی تھیں۔ تاہم، کچھ نجی اسکولوں کی جانب سے طلبہ کو 6 جنوری سے کلاسز شروع کرنے کے احکامات دیے جانے کی اطلاعات کے بعد افواہوں نے جنم لیا۔
