راولپنڈی کے ہولی فیملی اسپتال میں سیکیورٹی گارڈ کے مبینہ تشدد کے نتیجے میں ایک نوجوان جاں بحق ہو گیا۔ افسوسناک واقعہ اسپتال کی پارکنگ میں پیش آیا، جہاں معمولی تنازع نے سنگین صورت اختیار کرلی۔
والدہ کو چیک اپ کے لیے اسپتال لایا تھا
پولیس کے مطابق جاں بحق نوجوان کی شناخت محمد وقار کے نام سے ہوئی ہے، جو اپنی والدہ کو میڈیکل چیک اپ کے لیے ہولی فیملی اسپتال لایا تھا۔ چیک اپ کے بعد واپسی کے دوران اسپتال کی پارکنگ میں سیکیورٹی گارڈ سے اس کا تنازع ہوگیا۔
سیکیورٹی گارڈ پر تشدد کا الزام
ایف آئی آر کے مطابق تنازع کے دوران سیکیورٹی گارڈ نے محمد وقار پر مبینہ طور پر مکے اور لاتیں برسائیں۔ شدید تشدد کے باعث نوجوان کی طبیعت بگڑ گئی اور اسے دل کا دورہ پڑا، جس کے نتیجے میں وہ موقع پر ہی جاں بحق ہوگیا۔
پولیس کا کہنا ہے کہ یہ افسوسناک واقعہ دو روز قبل ہولی فیملی اسپتال کی پارکنگ میں پیش آیا تھا، جس کی اطلاع ملنے پر کارروائی عمل میں لائی گئی۔
پولیس نے واقعے کا مقدمہ تھانہ نیو ٹاؤن میں درج کرلیا ہے اور نامزد سیکیورٹی گارڈ کو گرفتار بھی کر لیا گیا ہے۔ پولیس کے مطابق واقعے کی مزید تفتیش جاری ہے اور تمام پہلوؤں کا جائزہ لیا جا رہا ہے۔
اسپتالوں میں سیکیورٹی انتظامات پر سوالات
واقعے کے بعد سرکاری اسپتالوں میں سیکیورٹی اہلکاروں کے رویے اور تربیت پر سوالات اٹھنے لگے ہیں۔ شہریوں نے مطالبہ کیا ہے کہ ایسے واقعات کی روک تھام کے لیے مؤثر اقدامات کیے جائیں تاکہ اسپتال جیسے حساس مقامات پر عوام خود کو محفوظ محسوس کر سکیں۔
