وفاقی وزیر داخلہ رانا ثنا اللہ نے انکشاف کیا ہے کہ تحریک انصاف نے پلاننگ کی ہوئی تھی کہ جس کے مطابق آج ہفتے کی رات تحریک انصاف کے کسی رہنما کے گھر پر چھاپے کے دوران فائرنگ اور ریپ کا جعلی ڈراما رچانے کی ایک سازش کی جانی تھی جو پکڑی گئی ہے۔
فیصل آباد میں پریس کانفرنس کرتے ہوئے انہوں نے کہا کہ انٹیلی جنس ایجنسیوں نے ایک گفتگو پکڑی ہے جس میں یہ پلاننگ کی جا رہی تھی کہ پی ٹی آئی کے کسی رہنما کے گھر پر جعلی ریڈ کرائی جائے گی جہاں فائرنگ بھی ہو گی اور دوسری پلاننگ میں ریپ کا ذکر ہے۔
تحریک انصاف نے ریپ جیسا انتہائی گھناونا اور گھٹیا ڈرامہ رچانے کی منصوبہ بندی کی جسے انٹیلی جنس اداروں نے بروقت پکڑ لیا ہے۔ یہ ڈرامہ آج ہی رات رچایا جانا تھا اسلئے مناسب سمجھا گیا کہ اسکو فوری طور پر قوم کے سامنے رکھ کر آگاہ دیا جائے، رانا ثنا اللہ pic.twitter.com/vw2RUqGvsY
— Raza Butt 🎙️ (@SocialDigitally) May 27, 2023
وزیر داخلہ کا کہنا تھا کہ ایسا کرنے والے کرداروں نے فائرنگ کا ایشو بنا کر تاثر دینا تھا کہ پاکستان میں کس طرح سے انسانی حقوق کی خلاف ورزی ہو رہی ہے۔ اس کا الزام اداروں پر لگایا جانا تھا اور پھر اس کے بعد اسے انٹرنیشنل میڈیا پر ہائی لائٹ کرنا تھا۔
یہ بھی پڑھیں 9 مئی واقعہ، 499 میں سے صرف 6 مقدمات آرمی ایکٹ کے تحت چلائے جائیں گے، رانا ثنا اللہ
رانا ثنا اللہ کا کہنا تھا کہ یہ واردات آج رات ہی کرنے کا منصوبہ بنایا گیا تھا اس لیے ضروری تھا کہ اس سازش کو قوم کے سامنے لایا جائے۔
انھوں نے کہا کہ زلمے خلیل زاد جیسے شخص کو پیسے دے کر پاکستان کے خلاف استعمال کیا جا رہا ہے اور یہ پلاننگ بھی اسی کی ایک کڑی تھی جس کے بعد انٹرنیشنل میڈیا پر پروپیگنڈا کیا جانا تھا۔
یہ بھی پڑھیں اسٹیبلشمنٹ بتائے مجھے مائنس کرنے سے ملک کو کیا فائدہ ہو گا؟ عمران خان
رانا ثنا اللہ کا کہنا تھا کہ عمران خان اپنے انجام کو پہنچ چکا ہے۔ سانحہ 9 مئی کے ذمہ داروں کے خلاف قانون کے مطابق کارروائی ہو گی اور کسی بے گناہ کو نشانہ نہیں بنایا جائے گا۔ وزیراعظم اور آرمی چیف کا عزم ہے کہ بے گناہ لوگوں کو کچھ نہیں کہا جائے گا۔
وزیر داخلہ نے عمران خان کو تنقید کا نشانہ بناتے ہوئے کہا کہ اس فتنے کی جانب سے یہ ڈراما کرنے کا مقصد قوم کو گمراہ کرنا تھا۔