آئی سی سی کی جانب سے بنگلہ دیش کی جانب سے ٹی20 ورلڈ کپ کے میچز بھارت سے سری لنکا منتقل کرنے کی درخواست مسترد کرنے اور بنگلہ دیش کی جگہ اسکاٹ لینڈ کو شامل کرنے کے فیصلے پر پاکستان ٹیسٹ کرکٹ ٹیم کے سابق ہیڈ کوچ و سابق آسٹریلوی کرکٹر جیسن گلیسپی نے سوالات اٹھا دیے ہیں۔
یہ بھی پڑھیں: بنگلہ دیش کو ایونٹ سے باہر کرنے کے بعد ٹی20 ورلڈ کپ کا نیا شیڈول جاری
سابق آسٹریلوی فاسٹ بولر جیسن گلیسپی نے آئی سی سی کے فیصلے پر سوشل میڈیا پلیٹ فارم ایکس پر کھل کر ردعمل دیتے ہوئے کہا کہ ’کیا آئی سی سی کی جانب سے یہ وضاحت دی گئی ہے کہ بنگلہ دیش اپنے میچز بھارت سے باہر کیوں نہیں کھیل سکتا؟‘
انہوں نے ماضی کی مثال دیتے ہوئے کہا کہ ’چیمپئنز ٹرافی کے دوران بھارت نے پاکستان میں میچز کھیلنے سے انکار کیا تھا، جس پر آئی سی سی نے بھارت کو اپنے میچز پاکستان سے باہر کھیلنے کی اجازت دی تھی‘۔ جیسن گلیسپی کے مطابق ایسی مثال موجود ہونے کے باوجود بنگلہ دیش کو یہی سہولت نہ دینا سمجھ سے بالاتر ہے۔
Has there been an explanation from the ICC why Bangladesh could not play their games outside of India?
From memory, India refused to play Champions Trophy matches in Pakistan and they were allowed to play those games outside of Pakistan.
Can someone make this make sense?!?! https://t.co/iyV2ul6O7P— Jason Gillespie (@dizzy259) January 24, 2026
آئی سی سی حکام کے مطابق اس فیصلے کی بنیاد ٹورنامنٹ کے شیڈول، لاجسٹکس اور براڈکاسٹنگ انتظامات کو قرار دیا گیا ہے۔ حکام کا مؤقف ہے کہ ایک ہی ملک میں میچز رکھنے سے سیکیورٹی اور انتظامی معاملات کو بہتر انداز میں سنبھالا جا سکتا ہے۔
دوسری جانب بنگلہ دیش کرکٹ بورڈ کا کہنا ہے آئی سی سی کی جانب سے مختلف ٹیموں کے ساتھ مختلف معیار اپنانا تشویش کا باعث ہے۔
یہ بھی پڑھیں: آئی سی سی نے چیمپیئنز ٹرافی اور27-2024 تک کے تمام ایونٹس کے لیے ہائبرڈ ماڈل کا اعلان کر دیا
کرکٹ مبصرین کے مطابق یہ معاملہ بنگلہ دیش کے فیصلے سے زیادہ آئی سی سی کی پالیسی اور اس کے اطلاق پر سوال اٹھاتا ہے، اور جیسن گلیسپی کا بیان اسی تضاد کو اجاگر کرتا ہے جس کی واضح وضاحت اب تک سامنے نہیں آ سکی۔
یاد رہے کہ بھارت نے چیمپئنز ٹرافی 2025 کے میچز کھیلنے کے لیے پاکستان آنے سے انکار کیا تھا، جس کے باعث آئی سی سی نے چیمپئنز ٹرافی کے میچز دبئی اور سری لنکا منتقل کیے تھے، جس کے بعد آئی سی سی نے ہائبرڈ ماڈل کے تحت ٹی20 ورلڈ کپ 2026 کے پاکستان کے میچز سری لنکا منتقل کیے ہیں۔
