بہاولپور میں ایک زمیندار نے فصل میں گھسنے کے الزام پر بھینس پر کلہاڑی کے وار کرتے ہوئے اس کی ٹانگیں کاٹ ڈالیں۔
پولیس کے مطابق واقعے کے بعد فوری کارروائی کرتے ہوئے ملزم کے خلاف مقدمہ درج کر کے اسے گرفتار کر لیا گیا ہے، تاہم جانور شدید زخمی حالت میں زندگی اور موت کی کشمکش میں مبتلا ہے۔
یہ بھی پڑھیے: لاہور کی 30 سالہ پرانی پرندہ مارکیٹ کیوں مسمار کی گئی؟
اس سے قبل پنجاب کے علاقے روات میں بھی اسی نوعیت کا ایک انتہائی افسوسناک واقعہ پیش آیا تھا جہاں ایک گدھی کو کھیت میں داخل ہونے پر بے رحمی کا نشانہ بنایا گیا۔ ایف آئی آر کے مطابق گدھی کے مالک نے جانور کو پانی پینے کے لیے آزاد چھوڑا تھا، جو غلطی سے ایک شخص کی زمین میں چلی گئی۔ اس پر ملزم ارشد محمود نے طیش میں آ کر گدھی کے دونوں کان کاٹ دیے تھے۔
جانوروں پر ظلم کی ایک اور ہولناک مثال 2024 میں سندھ کے علاقے سانگھڑ میں سامنے آئی تھی، جہاں ایک بااثر وڈیرے نے اپنے ساتھیوں کے ساتھ مل کر اونٹنی کی ٹانگ کاٹ دی۔ یہ واقعہ بھی زمین میں داخل ہونے کے تنازع پر پیش آیا، تاہم بااثر ملزم کے خلاف کارروائی تاخیر کا شکار رہی، جس پر سماجی حلقوں نے شدید تشویش کا اظہار کیا۔
یہ بھی پڑھیے: لاہور چڑیا گھر میں 5 برس کے دوران 70 قیمتی جانور اور پرندے ہلاک ہونے کا انکشاف
ان واقعات کے بعد شہریوں اور جانوروں کے حقوق کے لیے کام کرنے والی تنظیموں نے مطالبہ کیا ہے کہ بے زبان جانوروں پر تشدد کے مرتکب افراد کے خلاف سخت ترین کارروائی کی جائے تاکہ ایسے غیر انسانی واقعات کا سدباب ہو سکے۔
