پنجاب کی سینیئر وزیر مریم اورنگزیب نے پی ٹی آئی کے کارکنان اور دیگر عناصر کی سخت مذمت کی ہے جنہوں نے وزیراعلیٰ مریم نواز کے خلاف ان کی ذاتی استعمال کے لیے لگژری جیٹ خریدنے کے فیصلے پر مذموم مہم چلائی۔
مریم اورنگزیب نے کہا کہ میڈیا اور سوشل میڈیا پر وزیر اعلیٰ کے خلاف کردار کشی کرنے والے عناصر پی ٹی آئی سے وابستہ ہیں اور قومی میڈیا کو چاہیے کہ وہ ان کے خلاف سخت مؤقف اختیار کرے۔
مزید پڑھیں:امریکا نے قطر کا 400 ملین ڈالر کا لگژری جیٹ تحفہ قبول کرلیا، نیا ایئر فورس ون بنے گا
انہوں نے پی ٹی آئی کی زہریلی ذہنیت کو معاشرتی اور میڈیا پلیٹ فارمز پر پھیلنے والی بداعتمادی قرار دیا اور کہا کہ اس کا آغاز پی ٹی آئی کی حکومت کے دور میں ہوا تھا۔
ادھر پنجاب کے وزیر اطلاعات اعظم بخاری نے پی ٹی آئی کی ’گٹرمینٹلٹی‘ کو ملک و معاشرے کے لیے ایک سرطان قرار دیا۔
پنجاب حکومت نے وزیر اعلیٰ کے استعمال کے لیے 19 نشستوں پر مشتمل لگژری گلف اسٹریم جیٹ خریدی ہے جس کی قیمت 38 سے 42 ملین ڈالر (10 ارب روپے سے زائد) بتائی گئی ہے۔
ابتدائی طور پر حکومت نے اس خریداری پر خاموشی اختیار کی، بعد میں کہا کہ یہ تجویز کردہ ایئر لائن پروجیکٹ کا حصہ ہے اور پرانے طیارے کی جگہ نئی محفوظ جیٹ کی ضرورت تھی۔
پی ٹی آئی کے سیکریٹری اطلاعات شیخ وقاص اکرم نے اس خریداری کو معاشی مشکلات کے دوران فضول خرچی قرار دیا اور کہا کہ عوام پر مہنگائی اور بے روزگاری کے بوجھ کے وقت اربوں روپے کی یہ خریداری ناقابلِ قبول ہے۔
مزید پڑھیں:کرسٹیانو رونالڈو کا نیا لگژری منصوبہ، میڈرڈ میں مکمل رازداری پر مبنی کلب کھولنے کا اعلان
اسی طرح وزیر اعلیٰ خیبر پختونخوا کے مشیر برائے مالیات مزمل اسلم اور جماعت اسلامی کے امیر حافظ نعیم الرحمان نے بھی اس فیصلے پر تنقید کی اور اسے غیر مناسب اور اشرافیہ کے لیے بنایا گیا اقدام قرار دیا۔
