رمضان المبارک کے پہلے 6 دنوں کے دوران مسجد الحرام اور مسجد نبویؐ میں امورِ دینیہ کی صدارت کے تحت قائم کمیٹی برائے امر بالمعروف و نہی عن المنکر نے 56 ہزار سے زائد رہنمائی اور آگاہی مواد تقسیم کیا۔
انتظامیہ کی جانب سے رمضان میں زائرین کی خدمت کے سلسلے کو جاری رکھتے ہوئے مسجد نبویؐ میں ایک لاکھ 20 ہزار سے زائد نمازیوں اور زائرین کو رہنمائی اور مشاورتی خدمات فراہم کی گئیں۔
مزید پڑھیں:مسجد الحرام میں وہیل چیئر خدمات کے لیے 5 ہزار 200 اہلکاروں کی تربیت مکمل
تقسیم کیے گئے مواد میں مختلف تعلیمی و اصلاحی کتابچے شامل تھے، جبکہ مذہبی سوالات کے جوابات دینے کے ساتھ ساتھ موقع پر رہنمائی اور دینی مشاورت بھی فراہم کی گئی۔
دریں اثنا وزارت اسلامی امور، دعوت و ارشاد نے مسجد الحرام کے اطراف مرکزی علاقے کی مساجد اور نماز گاہوں میں دعوتی و آگاہی پروگراموں کا سلسلہ شروع کر دیا ہے۔
یہ اقدام رواں سال کے عمرہ سیزن کے لیے اسلام سے متعلق آگاہی منصوبے کے دوسرے مرحلے کا حصہ ہے، جو رمضان المبارک میں عمرہ زائرین کی بڑھتی ہوئی تعداد کے پیش نظر ترتیب دیا گیا ہے۔
مزید پڑھیں: مسجد الحرام کے اطراف کبوتروں کو کھلانے پر 1 ہزار ریال جرمانے کی وارننگ
منصوبے کے تحت دروس، روزانہ تعلیمی نشستیں اور نماز کے بعد خطابات شامل ہیں، جو وزارت کے نامزد سرکاری مبلغین انجام دے رہے ہیں۔
مزید برآں مختلف زبانوں کے مترجمین بھی فراہم کیے گئے ہیں تاکہ مختلف قومیتوں سے تعلق رکھنے والے زائرین تک پیغام مؤثر انداز میں پہنچایا جا سکے۔
