بھارتی سپر اسٹار رجنی کانت کی ایکشن فلم ’جیلر 2‘ باکس آفس پر مسلسل کامیابی حاصل کر رہی ہے اور دنیا بھر میں اس کی مجموعی کمائی 541 کروڑ بھارتی روپے تک پہنچ گئی ہے۔ فلم نے ریلیز کے چھٹے روز بھارت میں 45 کروڑ 55 لاکھ روپے کا کاروبار کیا، جس کے بعد اس کی کمائی 600 کروڑ روپے کے ہندسے کے قریب پہنچ گئی ہے۔
بھارتی میڈیا ادارے این ڈی ٹی وی کے مطابق فلم نے منگل، 20 اکتوبر کو 45 کروڑ 55 لاکھ روپے کمائے، جو پیر کی 42 کروڑ 35 لاکھ روپے کی کمائی سے 7.6 فیصد زیادہ ہیں۔ فلم کے کاروبار سے متعلق اعداد و شمار جاری کرنے والے ادارے سَیک نِلک کے مطابق بھارت میں فلم کی خالص آمدن 287 کروڑ 80 لاکھ روپے جبکہ مجموعی آمدن 337 کروڑ روپے ہو چکی ہے۔
Jailer 2 box office Day 7: Film sees first big dip, Rs 18 crore short of Rs 600 crorehttps://t.co/jOI0yy9Uzv
— India Today Showbiz (@Showbiz_IT) October 22, 2026
فلم کی بیرون ملک نمائش سے اب تک 204 کروڑ روپے حاصل ہوئے ہیں، جن میں منگل کے روز کمائے گئے 10 کروڑ روپے بھی شامل ہیں۔
تامل زبان میں سب سے زیادہ بزنس
’جیلر 2‘ کی کمائی میں تامل ورژن سب سے آگے ہے، جس نے منگل کو 31 کروڑ 20 لاکھ روپے کمائے۔ تیلگو ورژن کی آمدن 8 کروڑ 75 لاکھ روپے جبکہ ہندی ورژن نے 5 کروڑ روپے کا کاروبار کیا۔ کنڑ ورژن سے 60 لاکھ روپے حاصل ہوئے۔
یہ بھی پڑھیں:رجنی کانت کی خودنوشت پر فلم بنانے کی تیاری، بھارتی میڈیا میں قیاس آرائیاں
فلم کی ہدایت کاری نیلسن دلیپ کمار نے کی ہے۔ اس میں رجنی کانت ریٹائرڈ جیلر ٹائیگر متھوویل پانڈیان کے کردار میں ہیں، جس کی پُرامن زندگی جرائم کی دنیا سے ایک نئے خطرے کے سامنے آنے پر بدل جاتی ہے۔
فلم میں رجنی کانت کے ساتھ رامیا کرشنن، موہن لال، یوگی بابو، ودیا بالن، جیکی شروف اور وجے سیتھوپتی سمیت کئی معروف اداکار شامل ہیں۔
