راولپنڈی کے قریب قدیمی شہر ٹیکسلا میں مشہور لنگری (اوکھلی اور موصل) مقامی پتھر سے ہاتھوں کے ذریعے تیار کی جاتی ہے، جو اپنی پائیداری اور روایتی ڈیزائن کی وجہ سے مشہور ہے۔
یہ ٹیکسلا کی ثقافت کا حصہ ہے، اور سیاح عموماً یہاں سے بطور یادگار پتھر کے برتن، جیسے کہ لنگری اور دستہ، خریدنا پسند کرتے ہیں۔ لنگری یا ہاون دستہ برِ صغیر پاک و ہند کے ہر گھر کے کچن کا لازمی جزو ہے۔ پاکستان میں پتھر تراش کر لنگری بنانے کا کام زیادہ تر ٹیکسلا میں ہوتا ہے جہاں کی بنی لنگری اندرونِ ملک ہی نہیں پاکستان سے باہر بھی جاتی ہے۔
گزشتہ کئی عشروں سے ٹیکسلا میں لنگریاں تیار کرنے والے کاریگر محمد صدیق اس کام سے وابستہ ہیں اور کم مزدوری کا دکھڑا سنا رہے ہیں ۔’وی نیوز‘ سے بات کرتے ہوئے ان کا کہنا تھا کہ اس کام میں محنت بہت ہے اور بچت کم ،اب مشینیں آ گئی ہیں جس کی وجہ سے مزدوری کم ہو گئی ہے اور سارا کام اب مشینوں پہ ہو رہا ہے، ہاتھ سے لنگری بنانے والے اب ہم 2 یا 3 افراد رہ گئے ہیں جو اس کام کو جاری رکھے ہوئے ہیں دن بھر گردوغبار میں کام کرنے کی وجہ سے ہمیں بیماریاں بھی لاحق ہو چکی ہیں جب تک جان ہے یہی کام کرتے رہیں گے کیوں کہ اور کام ہمیں نہیں آتا۔
