نواز شریف اور مریم نواز سے گورنر تاشقند کی ملاقات، پنجاب اور تاشقند کو برادر صوبہ قرار دینے پر اتفاق

پاکستان مسلم لیگ (ن) کے صدر نواز شریف اور وزیراعلیٰ پنجاب مریم نواز شریف سے ازبکستان کے صوبے تاشقند کے گورنر زوئیر مرزا ایوف نے 7 رکنی وفد کے ہمراہ ملاقات کی۔

ملاقات میں دوطرفہ تعاون اور مختلف شعبوں میں شراکت داری بڑھانے پر تبادلہ خیال کیا گیا۔

ملاقات کے دوران پنجاب اور تاشقند کو برادر صوبہ قرار دینے پر اتفاق کیا گیا اور اس مقصد کے لیے خصوصی کمیٹی بھی تشکیل دے دی گئی۔

مختلف شعبوں میں معاشی تعاون بڑھانے پر اتفاق

ملاقات میں ٹورازم، زراعت، لائیو سٹاک، میٹ پراسیسنگ، بیوریجز، سٹرس فروٹ اور دیگر سیکٹرز میں معاشی تعاون کو فروغ دینے پر اتفاق کیا گیا جبکہ ازبکستان کی جانب سے لاہور میں بابر پارک کے قیام کی تجویز پر بھی غور کیا گیا۔

تاریخی عمارتوں کی بحالی پر مریم نواز کو خراج تحسین

گورنر تاشقند نے لاہور میں مغل دور کی تاریخی عمارتوں کی بحالی پر وزیراعلیٰ مریم نواز شریف کو خراج تحسین پیش کیا جبکہ وزیراعلیٰ نے دورہ ازبکستان کی دعوت شکریے کے ساتھ قبول کر لی۔

گورنر تاشقند نے ازبکستان کے صدر کی جانب سے پاکستان کے عوام بالخصوص اہل پنجاب کے لیے نیک تمناؤں کا پیغام بھی پہنچایا۔

ازبک پلاؤ کی تعریف اور شیف بھیجنے کی پیشکش

ازبک پلاؤ کی تعریف پر گورنر تاشقند نے مسرت کا اظہار کرتے ہوئے پاکستانی باورچیوں کی ٹریننگ کے لیے ازبک شیف بھیجنے کی پیشکش بھی کی۔

نواز شریف نے کہا کہ پاکستانی ازبکستان کے علمی و ثقافتی ورثے پر فخر کرتے ہیں اور سمرقند ماضی کی طرح آج بھی علم و ہنر کا مرکز ہے۔ انہوں نے کہا کہ ازبکستان کے کھانے بالخصوص پلاؤ پاکستانیوں کے مرغوب کھانوں میں شامل ہیں۔

لاہور کی تاریخی اہمیت پر اظہار خیال

نواز شریف نے کہا کہ لاہور کی ہزاروں سال پرانی تاریخ ہے اور انہیں لاہور سے خاص محبت ہے۔ انہوں نے کہا کہ جب وہ وزیر اعظم تھے تو ہر ویک اینڈ پر لاہور آ جاتے تھے۔ نواز شریف نے ازبکستان کے عوام بالخصوص اہل سمرقند کو سلام محبت بھی پیش کیا۔

گورنر تاشقند کا پنجاب میں سیاحت کے فروغ کی تعریف

گورنر تاشقند زوئیر مرزا ایوف نے پنجاب میں سیاحت کے فروغ اور تاریخی مقامات کی بحالی کو سراہتے ہوئے کہا کہ وزیراعلیٰ مریم نواز شریف کی ٹورازم، آرکیالوجی اور میوزیم کے فروغ کے لیے کاوشیں قابل تحسین ہیں۔

پاکستان اور ازبکستان کے درمیان تعاون کے وسیع مواقع

زوئیر مرزا ایوف نے کہا کہ پاکستان اور ازبکستان کے درمیان سیاحت، فارماسیوٹیکل، زراعت اور دیگر شعبوں میں معاشی تعلقات بڑھانے کے بے شمار مواقع موجود ہیں۔ انہوں نے کہا کہ ازبکستان میں ڈھائی ہزار کمپنیاں 74 ممالک کے اشتراک سے کام کر رہی ہیں جبکہ پاکستانی سرمایہ کاروں کے تعاون سے 22 کمپنیاں مختلف شعبوں میں کام کر رہی ہیں۔

ٹیکسٹائل اور سرمایہ کاری میں تعاون کی دعوت

گورنر تاشقند نے کہا کہ ازبکستان میں ٹیکسٹائل بالخصوص پولیسٹر کی بہت مانگ ہے اور پاکستانی کمپنیوں کے اشتراک کا خیر مقدم کیا جائے گا۔ انہوں نے ازبک مسجد کا سووینئر دیکھ کر بھی خوشی کا اظہار کیا۔

ازبکستان ہمارا برادر ملک ہے، وزیراعلیٰ مریم نواز

وزیراعلیٰ پنجاب مریم نواز شریف نے کہا کہ ازبکستان برادر ملک ہے اور پاکستان سماجی و معاشی تعلقات کو مزید مستحکم کرنا چاہتا ہے۔ انہوں نے کہا کہ ازبکستان سے محبت انہیں اپنے والد نواز شریف اور والدہ مرحومہ سے ورثے میں ملی ہے۔

لاہور میں ازبک کوزین ریسٹورنٹ محبت کی مثال

مریم نواز شریف نے کہا کہ لاہور میں ازبک کوزین ریسٹورنٹ پاکستانیوں کی ازبکستان سے محبت کا ثبوت ہے جبکہ پنجاب میں بہت سے تاریخی مقامات سیاحتی توجہ کا مرکز ہیں۔

پنجاب کی معیشت اور زراعت پر روشنی

مریم نواز شریف نے کہا کہ پنجاب میں زراعت، صنعت، سوشل سیکٹر اور انفراسٹرکچر کی بہتری کے لیے اربوں روپے کی سرمایہ کاری کی گئی ہے۔ ملک کی زراعت کا 70 فیصد پنجاب سے آتا ہے جبکہ سیالکوٹ، وزیر آباد اور فیصل آباد اہم صنعتی مراکز ہیں۔

زرعی پیداوار اور میٹ ایکسپورٹ پر توجہ

انہوں نے کہا کہ پاکستانی چاول دنیا میں بہترین شمار کیا جاتا ہے جبکہ مکئی اور گندم بھی پنجاب کی بڑی فصلیں ہیں۔ پنجاب میں زراعت اور لائیو سٹاک کی ویلیو ایڈڈ مصنوعات پر توجہ دی جا رہی ہے اور عالمی معیار کے مطابق تین لاکھ مویشی میٹ ایکسپورٹ کے لیے تیار ہیں۔

پاکستان اور ازبکستان مل کر دنیا کو حیران کر سکتے ہیں

مریم نواز شریف نے کہا کہ پاکستان ویلیو ایڈڈ ٹیکسٹائل میں نمایاں مقام رکھتا ہے اور پاکستان کی بیڈ شیٹس، ٹاول اور دیگر ٹیکسٹائل مصنوعات دنیا بھر میں پسند کی جاتی ہیں۔ ان کے مطابق پاکستان اور ازبکستان باہمی تعاون سے دنیا کو حیران کر سکتے ہیں۔