نیوزی لینڈ کرکٹ نے بلیک کیپس کے اسسٹنٹ کوچز لیوک رونکی اور جیکب اورم کو پاکستان سپر لیگ 2026 میں اسلام آباد یونائیٹڈ کے ساتھ کوچنگ ذمہ داریاں سنبھالنے کی اجازت دے دی۔
لیوک رونکی اسلام آباد یونائیٹڈ کے ہیڈ کوچ کے طور پر ٹیم میں واپسی کریں گے، جبکہ جیکب اورم ان کے معاون کوچ ہوں گے۔ رونکی اس سے قبل 2017 سے 2021 تک اس فرنچائز کے لیے بطور کھلاڑی کھیل چکے ہیں۔
یہ بھی پڑھیں: کس شہر میں کتنے میچز ہوں گے؟ پی ایس ایل 11 کے شیڈول کا اعلان
پی ایس ایل 26 مارچ سے شروع ہو کر اپریل کے آخر تک جاری رہے گی، جس کے باعث دونوں کوچز بلیک کیپس کی جنوبی افریقہ کے خلاف آئندہ سیریز اور اپریل میں بنگلہ دیش کے دورے میں ٹیم کے ساتھ موجود نہیں ہوں گے۔
بلیک کیپس کے پرفارمنس مینیجر مائیک سینڈل نے کہا کہ نیوزی لینڈ کرکٹ رونکی اور اورم کے اس کوچنگ موقع کی حمایت کرتی ہے۔ ان کے مطابق یہ دونوں کوچز کے لیے بین الاقوامی سطح پر تجربہ بڑھانے کا بہترین موقع ہے اور وہ اس سے حاصل ہونے والا تجربہ مستقبل میں نیوزی لینڈ کرکٹ کے لیے بھی فائدہ مند بنا سکتے ہیں۔
یہ بھی پڑھیں: پی ایس ایل 11: ڈیوڈ وارنر دوبارہ کراچی کنگز کے کپتان مقرر
نیوزی لینڈ ٹیم جنوبی افریقہ کے خلاف 5 ٹی20 میچوں کی سیریز کا آغاز 15 مارچ کو کرے گی، جس کا پہلا میچ ماؤنٹ ماؤنگانوئی میں کھیلا جائے گا۔
