وفاقی وزیرِ بحری امور محمد جنید انور چوہدری نے کراچی بندرگاہ سے متحدہ عرب امارات کے لیے نئی فیڈر شپنگ سروس کے آغاز کا اعلان کیا ہے، جسے ٹرانس شپمنٹ صلاحیتوں کی جانب اہم پیش رفت قرار دیا جا رہا ہے۔
وزارتِ بحری امور کی جانب سے جاری بیان کے مطابق اس نئی سروس کے ذریعے پاکستانی درآمد کنندگان اور برآمد کنندگان کو عالمی کنٹینر شپنگ نیٹ ورک تک قابلِ اعتماد رسائی حاصل ہوگی۔
یہ بھی پڑھیے: امریکی بحری جہاز یو ایس ایس وین ای میئر کراچی بندرگاہ پہنچ گیا
وفاقی وزیر نے کہا کہ اس اقدام سے پاکستان کی سمندری تجارت کو فروغ ملے گا اور خطے کے اہم بندرگاہی مراکز کے ساتھ رابطہ مزید مضبوط ہوگا۔
چیئرمین کراچی پورٹ ٹرسٹ شاہد احمد نے کہا کہ اس نئی فیڈر سروس کے آغاز سے کراچی بندرگاہ کی علاقائی رابطہ کاری میں مزید بہتری آئے گی اور یہ پاکستان کی بڑھتی ہوئی تجارتی ضروریات کو پورا کرنے میں مدد دے گی۔
ان کا کہنا تھا کہ کراچی بندرگاہ کو جدید تقاضوں کے مطابق فعال بنانے اور عالمی تجارتی راستوں سے جوڑنے کے لیے مختلف اقدامات کیے جا رہے ہیں۔
