حکومتِ پاکستان نے پٹرولیم مصنوعات کی قیمتیں برقرار رکھنے کا فیصلہ کیا ہے۔ وزارتِ توانائی (پٹرولیم ڈویژن) کی جانب سے جاری اعلامیے کے مطابق وزیرِ اعظم کی منظوری سے 14 مارچ 2026 سے پیٹرول اور ہائی اسپیڈ ڈیزل کی قیمتیں موجودہ سطح پر برقرار رکھی جائیں گی۔
اعلامیے کے مطابق حکومت آئل مارکیٹنگ کمپنیوں کو قیمتوں کے فرق کی مد میں ادائیگی کرے گی۔ ہائی اسپیڈ ڈیزل پر فی لیٹر 75 روپے 05 پیسے جبکہ موٹر اسپرٹ (پیٹرول) پر 49 روپے 63 پیسے فی لیٹر ادا کیے جائیں گے۔
یہ بھی پڑھیے: ملک میں پیٹرول اور ڈیزل کی سپلائی میں تعطل کا خدشہ نہیں، وزیر خزانہ کی زیر صدارت اجلاس کو بریفنگ
حکام کے مطابق 14 مارچ سے 20 مارچ 2026 کے دوران آئل مارکیٹنگ کمپنیوں کے لیے قیمتوں کے فرق کی مجموعی ادائیگی تقریباً 23 ارب روپے ہوگی، جو اوگرا کے ذریعے ادا کی جائے گی۔
اس مقصد کے لیے حکومت نے وزیرِ اعظم آستریٹی فنڈ قائم کرنے کی منظوری دی ہے جبکہ اقتصادی رابطہ کمیٹی نے اس فنڈ کے لیے 27 اعشاریہ 1 ارب روپے مختص کرنے کی منظوری بھی دے دی ہے۔ اس رقم میں سے 23 ارب روپے اوگرا کو منتقل کیے جائیں گے تاکہ آئل کمپنیوں کو ادائیگی کی جا سکے۔
یہ بھی پڑھیے: مہنگائی نے عوام کا جینا مشکل کردیا، حکومت نے پیٹرول کی قیمت پہلے ہی کیوں بڑھائی؟
اعلامیے کے مطابق اوگرا کو ہدایت کی گئی ہے کہ وہ قیمتوں کے فرق کی ادائیگی کے لیے طریقہ کار تیار کرے اور آئل کمپنیوں کی جانب سے جمع کرائے گئے بلوں کی تصدیق اور آڈٹ کا عمل بھی یقینی بنائے۔
