اسلام آباد پولیس کے انسپکٹر عمر حیات پر فائرنگ کرنے والے ملزم کو گرفتار کر لیا گیا ہے۔ ملزم نے ابتدائی تفتیش میں انکشاف کیا کہ اس نے فائرنگ ذاتی رنجش کی بنیاد پر کی تھی۔
ملزم واقعے کے بعد روپوش ہو گیا تھا، تاہم اسلام آباد پولیس نے قلیل عرصہ میں اسے گرفتار کر لیا۔ آئی جی اسلام آباد سید علی ناصر رضوی نے واقعے کا فوری نوٹس لیتے ہوئے ملزم کی جلد گرفتاری کے احکامات جاری کیے تھے۔
یہ بھی پڑھیے: اسلام آباد پولیس کی کارروائی میں ڈکیت گینگ کا رکن زخمی حالت میں گرفتار
اس سلسلے میں اسلام آباد پولیس نے سات ٹیمیں تشکیل دی تھیں جنہوں نے شب و روز محنت کرتے ہوئے ہیومن انٹیلیجنس، ڈیجیٹل سرویلینس اور سیلولر ٹیکنالوجی کی مدد سے ملزم کا سراغ لگا کر اسے گرفتار کیا۔
واقعے کے بعد پولیس کا کہنا ہے کہ شہریوں کی حفاظت اور قانون نافذ کرنے والے اہلکاروں کی سلامتی کو یقینی بنانے کے لیے فوری اور مؤثر کارروائی کی گئی۔
