ٹیکنالوجی کمپنی ایپل نے اپنے پہلے فولڈیبل آئی فون کی متوقع لانچ مؤخر کردی ہے، کیونکہ کمپنی نے مارکیٹ میں جلد بازی سے داخل ہونے کے بجائے ڈیوائس کے معیار اور مضبوطی کو ترجیح دینے کا فیصلہ کیا ہے۔ اس تاخیر کے باعث فولڈیبل اسمارٹ فون کی دوڑ میں سام سنگ اور ہواوے پہلے ہی نمایاں مقام حاصل کرچکے ہیں۔
رپورٹس کے مطابق ایپل ایسا فون بنانا چاہتی تھی جس کی اسکرین فولڈ ہونے کے باوجود کھولنے پر بالکل ہموار نظر آئے، یعنی درمیان میں کوئی لکیر، شکن یا دباؤ کا نشان دکھائی نہ دے۔
یہ بھی پڑھیں: فولڈ ایبل آئی فون 17 ایئر کب لانچ ہوگا، خصوصیات کیا ہیں؟
اگرچہ پہلی نسل میں یہ ہدف مکمل طور پر حاصل نہیں ہوسکا، تاہم کمپنی کا نیا فلیگ شپ فون صنعت کے جدید ترین قبضہ نظاموں میں سے ایک کے ساتھ متعارف کرایا جائے گا۔
ماہرین کے مطابق نئے ڈیزائن کا مقصد اسکرین کو زیادہ لچکدار بنانا اور ساختی خامیوں کو کم نمایاں کرنا ہے۔ تاہم اس کے ساتھ یہ خدشہ بھی ظاہر کیا جا رہا ہے کہ زیادہ لچکدار ڈسپلے نسبتاً نازک ہو سکتا ہے، جس کے باعث نقصان کا امکان بڑھ سکتا ہے۔
پیچیدہ انجینئرنگ اور جدید ٹیکنالوجی کے استعمال کے سبب اس فون کی تیاری کی لاگت بھی زیادہ ہونے کا امکان ہے، جس کا اثر قیمت پر پڑسکتا ہے۔
یہ بھی پڑھیں: آئی فون کی فروخت نے تاریخ کی بلند ترین سطح حاصل کر لی
اطلاعات کے مطابق ایپل نے مہنگی باریک مشینی تیاری کے بجائے ایک نیا طریقہ اختیار کیا ہے جس میں تھری ڈی پرنٹڈ ٹائٹینیم قبضوں کے اندر مخصوص بھراؤ مواد استعمال کیا جارہا ہے۔
یہ طریقہ کار انتہائی باریک خلا کو پُر کر کے رگڑ اور دباؤ کے امکانات کو کم کرتا ہے، جس سے اسکرین پر پڑنے والا دباؤ کم ہو جاتا ہے اور پیداواری عمل بھی بہتر بنتا ہے۔
ماہرین کا کہنا ہے کہ اگرچہ فولڈیبل فون کی قیمت زیادہ ہو سکتی ہے، تاہم ایپل کی عالمی مقبولیت اور صارفین کی دلچسپی کے باعث اس ڈیوائس کی مانگ مضبوط رہنے کی توقع ہے۔ کمپنی کے فولڈیبل آئی فون کی متوقع آمد کو اسمارٹ فون مارکیٹ میں ایک اہم پیشرفت قرار دیا جارہا ہے۔
