چیئرمین سینیٹ سید یوسف رضا گیلانی کی ہدایت پر سینیٹ سیکرٹریٹ نے کفایت شعاری مہم کے تحت 26 کروڑ 50 لاکھ روپے قومی خزانے میں جمع کرا دیے، جبکہ مالی نظم و ضبط اور غیر ضروری اخراجات میں کمی پر مزید اقدامات جاری رکھنے کا اعلان بھی کیا گیا ہے۔
یہ بھی پڑھیں:سینیٹ کمیٹی نے نادرا کو شناختی کارڈ عارضی ضبط کرنے کی اجازت دینے والا بل منظور کرلیا
سینیٹ سیکرٹریٹ کے میڈیا ڈائریکٹوریٹ کے مطابق یہ فیصلہ چیئرمین سینیٹ سید یوسف رضا گیلانی کی خصوصی ہدایت پر کیا گیا، جس کے تحت ادارے کے اخراجات کا تفصیلی جائزہ لیا گیا اور بچت کی مد میں خطیر رقم وزارتِ خزانہ کے حوالے کر دی گئی۔
چیئرمین سینیٹ نے کفایت شعاری اقدامات پر سختی سے عملدرآمد کی ہدایت کرتے ہوئے غیر ضروری اخراجات میں کمی اور دستیاب وسائل کے مؤثر استعمال پر زور دیا۔ انہوں نے واضح کیا کہ موجودہ معاشی حالات میں مالی نظم و ضبط نہایت ضروری ہے۔
سید یوسف رضا گیلانی کا کہنا تھا کہ سینیٹ قومی معاشی استحکام کے لیے حکومتی اقدامات کی مکمل حمایت کرتی ہے اور اس سلسلے میں مزید بچتوں کی نشاندہی کے لیے بھی اقدامات جاری ہیں۔ ان کا کہنا تھا کہ آئندہ بھی اضافی رقوم قومی خزانے میں جمع کرائی جائیں گی۔
چیئرمین سینیٹ نے اس بات کی یقین دہانی کرائی کہ کفایت شعاری اقدامات کے باوجود پارلیمانی امور اور قانون سازی کا عمل کسی صورت متاثر نہیں ہوگا۔
یہ بھی پڑھیں:الیکشن کمیشن نے مراد سعید کو سینیٹ کی نشست کے لیے نااہل قرار دے دیا
سینیٹ سیکرٹریٹ کی جانب سے اس عزم کا اعادہ بھی کیا گیا کہ شفاف اور جوابدہ مالیاتی نظام کو ہر صورت برقرار رکھا جائے گا تاکہ قومی وسائل کا بہترین استعمال یقینی بنایا جا سکے۔
