بنگلہ دیش کے مختلف علاقوں میں ہفتہ کی صبح آسمانی بجلی گرنے کے 2 الگ الگ واقعات میں کم از کم 3 کسان جاں بحق جبکہ 6 افراد زخمی ہوگئے، واقعات اس وقت پیش آئے جب کسان کھلے کھیتوں میں کام کر رہے تھے، حکام نے ہلاکتوں کی تصدیق کر دی۔
یہ بھی پڑھیں:بنگلہ دیش کے ضلع ٹانگائل میں ٹرین حادثہ، 5 افراد جاں بحق
بنگلہ دیش کے اضلاع شیلکوپا اور پتنیتالا میں پیش آنے والے افسوسناک واقعات میں آسمانی بجلی نے 3 کسانوں کی جان لے لی جبکہ متعدد افراد زخمی ہوگئے۔
پہلا واقعہ شیلکوپا کے علاقے امیدپور یونین کے خریباریا کھیت میں پیش آیا جہاں پیاز کی فصل کی کٹائی کے دوران 2 کسان، اپو بسواس (22) اور سمیر بسواس (40)، آسمانی بجلی کی زد میں آکر شدید زخمی ہوگئے۔ دونوں کو فوری طور پر مقامی اسپتال منتقل کیا گیا تاہم ڈاکٹرز نے انہیں مردہ قرار دے دیا۔
اسی واقعے میں ایک ریٹائرڈ استاد سمیت 2 دیگر افراد بھی زخمی ہوئے، جنہیں طبی امداد فراہم کی جا رہی ہے۔
دوسرا واقعہ پتنیتالا کے علاقے تیپوکوریا میں پیش آیا جہاں اشرف علی (32) گندم کی کٹائی کے دوران بجلی گرنے سے جاں بحق ہوگئے۔ اس حادثے میں مزید چار افراد زخمی ہوئے جنہیں قریبی طبی مرکز منتقل کر دیا گیا۔
یہ بھی پڑھیں:بنگلہ دیش: بس دریائے پدما میں گرنے سے کم از کم 23 افراد ہلاک
پولیس حکام کے مطابق تمام قانونی کارروائی مکمل کرنے کے بعد لاشیں ورثا کے حوالے کر دی گئی ہیں جبکہ زخمیوں کا علاج جاری ہے۔
