قومی اسمبلی کی ہاؤس بزنس ایڈوائزری کمیٹی کا اجلاس اسپیکر سردار ایاز صادق کی صدارت میں منعقد ہوا۔
اجلاس میں قومی اسمبلی کے 26 ویں اجلاس کے ایجنڈے اور دورانیے پر تفصیلی تبادلہ خیال کیا گیا، جس کے بعد موجودہ اجلاس کو 10 اپریل 2026 بروز جمعہ تک جاری رکھنے کا فیصلہ کیا گیا۔
اس اجلاس میں وقفہ سوالات، اہم قانون سازی اور دیگر اہم قومی مسائل کو زیرِ بحث لانے کا فیصلہ کیا گیا۔
اس موقع پر اسپیکر قومی اسمبلی سردار ایاز صادق نے کہاکہ کفایت شعاری مہم کے تحت قومی اسمبلی کی 75 فیصد سرکاری گاڑیوں کو گراونڈ کردیا گیا ہے، جبکہ صرف 200 ملازمین دفتر میں حاضر ہوں گے۔ علاوہ ازیں پروٹوکول کی تمام گاڑیوں کو بھی معطل کردیا گیا ہے۔
اجلاس میں ڈپٹی اسپیکر سید غلام مصطفیٰ شاہ، وفاقی وزیر برائے پارلیمانی امور ڈاکٹر طارق فضل چوہدری، خالد حسن مگسی اور شیخ آفتاب احمد نے شرکت کی۔
اجلاس میں اراکین قومی اسمبلی نزہت صادق، سیدہ شہلا رضا، شازیہ مری اور سید حفیظ الدین بھی شریک ہوئے۔
