عراق کے شہر بغداد میں امریکا کی ایوارڈ یافتہ فری لانس صحافی شیلی کِٹلسن کو منگل کے روز نامعلوم افراد نے اغوا کر لیا، جس کی تصدیق عراقی وزارتِ داخلہ نے کر دی ہے، تاہم مزید تفصیلات جاری نہیں کی گئیں۔
حکام کے مطابق سکیورٹی فورسز نے اغوا کاروں کی گاڑی کا تعاقب کیا، جو الٹ گئی، جس کے نتیجے میں ایک مشتبہ شخص کو گرفتار کر لیا گیا جبکہ گاڑیاں بھی تحویل میں لے لی گئیں۔ بتایا گیا ہے کہ اغوا میں دو گاڑیاں استعمال ہوئیں، جن میں سے ایک صحافی کو لے کر جنوبی سمت فرار ہو گئی۔
یہ بھی پڑھیے: عراق میں امریکی فضائیہ کے طیارہ حادثے میں ہلاک 6 اہلکاروں کی شناخت جاری
عرب میڈیا کے ایک چینل کی جانب سے نشر کی گئی ویڈیو میں مسلح افراد کو ایک مصروف سڑک پر ان کی گاڑی روک کر انہیں زبردستی باہر نکالتے اور ساتھ لے جاتے ہوئے دکھایا گیا ہے، تاہم اس ویڈیو کی تصدیق تاحال نہیں ہو سکی۔
یہ واضح نہیں کہ یہ اغوا جاری امریکا-اسرائیل اور ایران کشیدگی سے جڑا ہوا ہے یا نہیں، تاہم ایران کی حمایت یافتہ تنظیمیں ماضی میں عراق میں امریکی تنصیبات پر حملے کرتی رہی ہیں۔
یہ بھی پڑھیے: عراق: ایرانی فورسز کی کردوں کے خلاف کارروائی، کیمپ تباہ
امریکی سفارتخانے کی جانب سے پہلے ہی اپنے شہریوں کو اغوا کے خطرات سے خبردار کرتے ہوئے عراق چھوڑنے کی ہدایت کی گئی تھی۔
اس سے قبل بھی 2023 میں پرنسٹن یونیورسٹی کی گریجویٹ الزبتھ تسورکوف کو بغداد سے اغوا کیا گیا تھا، جنہیں ایران سے منسلک عراقی ملیشیا ‘کتائب حزب اللہ’ نے اغوا کیا تھا۔ شیلی کِٹلسن کے اغوا کے واقعے کی تحقیقات جاری ہیں۔
