ٹیکنالوجی کی دنیا میں کم ہی کمپنیاں ایسی ہیں جنہوں نے روزمرہ زندگی میں ٹیکنالوجی کے استعمال کو ایپل کی طرح متاثر کیا ہو۔ اس ہفتے اپنی 50ویں سالگرہ منانے والی کمپنی کا آغاز سان فرانسسکو کے ایک گیراج میں دو اسٹیوز نے کیا تھا، اور تب سے اب تک ایپل نے شاندار کامیابیاں بھی حاصل کیں اور چند نمایاں ناکامیوں کا سامنا بھی کیا۔
یہ بھی پڑھیں: ایپل 50 سال کا ہوگیا: سالگرہ پر ڈسکاؤنٹ آفرز، پاکستان میں کیا فائدہ ہوسکتا ہے؟
ماہرین کے مطابق آج دنیا میں تقریباً ہر تین میں سے ایک شخص کے پاس ایپل کی کوئی نہ کوئی ڈیوائس موجود ہے۔ تجزیہ کاروں کا کہنا ہے کہ اس کامیابی میں جدید ہارڈویئر کے ساتھ طاقتور برانڈنگ اور مارکیٹنگ کا بھی بڑا کردار رہا، کیونکہ ایپل نے صرف مصنوعات نہیں بلکہ ایک طرزِ زندگی فروخت کیا۔
اسٹیو جابز کے انتقال کے بعد کمپنی نے نئی انقلابی مصنوعات متعارف کرانے کے بجائے موجودہ ٹیکنالوجی کو بہتر بنانے پر زیادہ توجہ دی، تاہم سی ای او ٹم کک کی قیادت میں کمپنی مسلسل منافع بخش رہی۔
ذیل میں وہ تین مصنوعات دی جا رہی ہیں جنہوں نے دنیا بدل دی، اور تین ایسی جنہیں کامیابی حاصل نہ ہوسکی۔
یہ بھی پڑھیں: ایپل صارفین کے لیے انتباہ، لاکھوں آئی فونز ہیک ہونے کا خطرہ!
2001 میں متعارف کرایا جانے والا آئی پوڈ پہلا ڈیجیٹل میوزک پلیئر نہیں تھا، مگر اس نے موسیقی سننے کا انداز بدل دیا۔ آسان ڈیزائن، کلک ویل کنٹرول اور آئی ٹیونز لائبریری کے ذریعے قانونی ڈیجیٹل میوزک ڈاؤن لوڈنگ عام ہو گئی۔ ماہرین کے مطابق آئی پوڈ نے ایپل کو اسمارٹ فون انڈسٹری میں داخل ہونے کی مالی اور تکنیکی بنیاد فراہم کی۔
2007 میں اسٹیو جابز نے آئی فون کو ایک ہی ڈیوائس میں فون، آئی پوڈ اور انٹرنیٹ کمیونیکیٹر قرار دے کر متعارف کرایا۔ اگرچہ ٹچ اسکرین اور انٹرنیٹ والے فون پہلے بھی موجود تھے، مگر آئی فون کی ڈیزائننگ اور مارکیٹنگ نے اسمارٹ فون کو مرکزی دھارے میں لا کھڑا کیا۔ آج ہر سال 200 ملین سے زائد آئی فون فروخت ہوتے ہیں۔
2015 میں لانچ ہونے والی ایپل واچ ٹم کک کے دور کی بڑی کامیابی ثابت ہوئی۔ یہ دنیا کی سب سے زیادہ فروخت ہونے والی اسمارٹ واچ بن گئی اور صحت سے متعلق فیچرز جیسے ECG مانیٹرنگ اور فال ڈیٹیکشن نے ویئریبل ہیلتھ ٹیکنالوجی کو نئی سمت دی۔
وہ مصنوعات جو کامیاب نہ ہوسکیں
1983 میں تقریباً 10,000 ڈالر قیمت کے ساتھ متعارف کرایا گیا یہ کمپیوٹر گرافیکل یوزر انٹرفیس اور ماؤس جیسی جدید خصوصیات رکھتا تھا، مگر زیادہ قیمت کی وجہ سے تجارتی کامیابی حاصل نہ کر سکا۔ بعد میں ایپل نے اسی تجربے سے سیکھ کر میکنتوش متعارف کرایا۔
یہ بھی پڑھیں: ایپل نے دوسری جنریشن کے ایئرپوڈز میکس 549 ڈالر میں متعارف کرا دیے
2015 میں لیپ ٹاپس کے لیے متعارف کرایا گیا یہ کی بورڈ ڈیزائن پتلا تو تھا مگر پائیداری کے مسائل کا شکار رہا۔ صارفین نے ٹائپنگ کے تجربے اور خرابیوں پر شکایات کیں، جس کے بعد کمپنی نے 2019 میں اسے ختم کر دیا۔
مکسڈ ریئلٹی ہیڈسیٹ ویژن پرو ایپل کی بڑی شرط سمجھا جا رہا تھا، مگر ماہرین کے مطابق اس کا بھاری ڈیزائن اور محدود عملی استعمال اسے عام صارفین میں مقبول بنانے میں ناکام رہا۔
ایپل اپنی نصف صدی مکمل کرنے کے بعد بھی ٹیکنالوجی کی دنیا میں اثر انداز ہے، تاہم ماہرین کا ماننا ہے کہ کمپنی کی اصل پہچان وہ جدت تھی جو اسٹیو جابز کے دور میں بار بار دنیا کو حیران کرتی رہی۔
