وزیراعظم شہباز شریف نے متحدہ عرب امارات کی خورفکان بندرگاہ پر پیش آنے والے واقعے پر گہری تشویش کا اظہار کیا ہے، جہاں ایک روکے گئے میزائل یا پروجیکٹائل کے باعث شہری زخمی ہوئے، جن میں پاکستانی شہری بھی شامل ہیں۔
سماجی رابطے کی ویب سائٹ ایکس پر اپنے بیان میں وزیراعظم نے کہا کہ وہ زخمی ہونے والوں کی جلد صحتیابی کے لیے دعاگو ہیں۔ انہوں نے بتایا کہ حکومت پاکستان اماراتی حکام کے ساتھ مسلسل رابطے میں ہے تاکہ متاثرہ پاکستانی شہریوں کو ہر ممکن معاونت فراہم کی جا سکے۔
یہ بھی پڑھیے: پاکستان نے متحدہ عرب امارات کے مالی ذخائر سے متعلق گمراہ کن تبصروں کو مسترد کردیا
وزیراعظم نے کہا کہ پاکستان مشکل کی اس گھڑی میں متحدہ عرب امارات کے برادر عوام کے ساتھ مکمل یکجہتی کا اظہار کرتا ہے۔ انہوں نے خطے میں کشیدگی کم کرنے اور تحمل کا مظاہرہ کرنے کی فوری ضرورت پر بھی زور دیا۔
شہباز شریف نے اپنے پیغام میں کہا کہ موجودہ صورتحال میں امن و استحکام کے لیے تمام فریقین کو ذمہ داری کا مظاہرہ کرنا چاہیے تاکہ مزید جانی نقصان سے بچا جا سکے۔
