وزیراعظم پاکستان شہباز شریف نے آزاد کشمیر کے دارالحکومت مظفرآباد اور گلگت شہر کے عوام کو خوشخبری سنا دی۔
وزیراعظم پاکستان شہباز شریف کی زیر صدارت پیٹرولیم مصنوعات، توانائی کی بچت اور کفایت شعاری اقدامات کے نفاذ سے متعلق اہم جائزہ اجلاس منعقد ہوا۔
اجلاس میں ملک بھر میں بازاروں، مارکیٹوں اور شاپنگ مالز کے اوقات کار سے متعلق فیصلہ کرتے ہوئے پنجاب، خیبرپختونخوا، بلوچستان، اسلام آباد کیپیٹل ٹیریٹری، گلگت بلتستان اور آزاد جموں و کشمیر میں تمام بازار، مارکیٹس اور شاپنگ مالز رات 8 بجے بند کرنے کا فیصلہ کیا گیا۔
تاہم خیبر پختونخوا کے ڈویژنل ہیڈکوارٹرز میں بازار، مارکیٹیں اور شاپنگ مالز رات 9 بجے تک کھلے رکھنے کی اجازت دینے کا فیصلہ بھی کیا گیا، جسے صوبائی حکومتوں کی مشاورت سے طے کیا گیا ہے۔
اجلاس میں فیصلہ کیا گیا کہ روزمرہ استعمال کی اشیا کی دکانیں، ڈیپارٹمنٹل اسٹورز اور تمام مالز بھی رات 8 بجے بند ہوں گے۔
اس کے علاوہ بیکریاں، ریسٹورنٹس، تندور اور کھانے پینے کی دیگر دکانیں رات 10 بجے بند کی جائیں گی۔
فیصلے کے مطابق شادی ہالز، مارکیز اور دیگر کمرشل مقامات جہاں شادی بیاہ کی تقریبات منعقد ہوتی ہیں، رات 10 بجے کے بعد بند رہیں گے۔
اجلاس سے خطاب کرتے ہوئے وزیراعظم شہباز شریف نے کہاکہ گلگت شہر اور مظفرآباد شہر میں انٹراسٹی پبلک ٹرانسپورٹ ایک ماہ کے لیے مفت ہوگی، اور تمام اخراجات وفاقی حکومت برداشت کرے گی۔
