پیپلز پارٹی کے مرکزی رہنما ندیم افضل چن کے والد اور سابق صوبائی وزیر حاجی افضل چن کو لاہور سے گرفتاری کے کچھ گھنٹے بعد رہا کردیا گیا ہے۔
پنجاب پولیس اور سی آئی اے منڈی بہاؤالدین نے مشترکہ طور پر لاہور میں حاجی افضل چن کی رہائش گاہ چن ہاؤس سے رات گئے انہیں گرفتار کرکے نامعلوم مقام پر منتقل کردیا تھا۔ حاجی افضل چن کے اہل خانہ کے مطابق پولیس بغیر وارنٹ دکھائے گھر میں داخل ہوئی اور ملازمین پر تشدد کیا۔
بلاول بھٹو کے دورہ عراق کی تیاریوں کے سلسلے میں نجف اشرف میں موجود ندیم افضل چن نے اپنے والد کی گرفتاری پر ٹوئیٹ کیا کہ وہ نجف میں ہوں اور میرے گھر سے میرے 85 سالہ والد کو گرفتار کر لیا ہے۔
میں نجف میں ھو ں اور میرے گھر سے میرے ۷۵ سالہ والد کو گرفتار کر لیا ھے۔
— Nadeem Afzal Chan (@NadeemAfzalChan) June 4, 2023
انہوں نے کہا کہ ان کے والد 1998 سے سیاست سے ریٹائر ہوچکے ہیں اگر گرفتاری درکار ہے تو وہ عراق سے واپسی پر گرفتاری دے دیں گے لیکن ان کے بزرگ والد کو چھوڑ دیا جائے۔
میرے والد صاحب کو رھا کر دیا گیا ھے میں تمام بھایئوں۔ دوستوں کا شکر گزار ھوں جنہوں نے اس مشکل لمحات میں ساتھ دیا۔ اور میرے امام نے Suo moto لیا۔ پروردگار پاکستان میں عدل کا بول بالا کر۔
— Nadeem Afzal Chan (@NadeemAfzalChan) June 4, 2023
تاہم ایک گھنٹے بعد ندیم افضل چن نے ایک اور ٹوئیٹ میں بتایا کہ ان کے والد کو رہا کردیا گیا ہے۔ ’میں تمام بھایئوں دوستوں کا شکر گزار ہوں جنہوں نے اس مشکل لمحات میں ساتھ دیا اور میرے امام نے سوموٹو لیا۔ پروردگار پاکستان میں عدل کا بول بالا کر۔‘
