برصغیر کی نامور گلوکارہ آشا بھوسلے کے انتقال کی خبر نے دنیا بھر کے مداحوں کو غم میں مبتلا کر دیا، جبکہ پاکستان میں بھی فنکاروں اور شوبز شخصیات نے انہیں خراجِ عقیدت پیش کیا۔
ان کے انتقال پر پاکستان کے شوبز ستارے بھی افسردہ ہیں اور انہیں خراج عقیدت پیش کررہے ہیں، اداکار احسن خان نے ان کے انتقال کو ایک عہد کا اختتام قرار دیا۔
اداکار عدنان صدیقی نے کہا کہ ان کی آواز میں ایک ایسی تاثیر تھی جو خاموش لمحوں کو بھی گہرے احساس سے بھر دیتی تھی۔ انہوں نے کہا کہ آج وہی خاموشی مزید بوجھل محسوس ہو رہی ہے اور ان کا فن ہمیشہ سنائی دیتا رہے گا۔
اداکار احمد علی بٹ نے ان کی لازوال دھنوں پر شکریہ ادا کیا، جبکہ گلوکار علی ظفر نے انہیں غیر معمولی فنکار قرار دیتے ہوئے کہا کہ ان کا کام آنے والی نسلوں کو متاثر کرتا رہے گا اور ایسی آوازیں کبھی ختم نہیں ہوتیں بلکہ وقت کا حصہ بن جاتی ہیں۔
گلوکار شجاع حیدر نے کہا کہ آشا بھوسلے کی آواز نے دنیا بھر میں لاکھوں لوگوں کو متاثر کیا اور ان کا نام ہمیشہ موسیقی کی تاریخ میں سنہرے حروف سے لکھا جائے گا۔
اداکار یاسر حسین نے ایک مشہور گیت کی لائن شیئر کرتے ہوئے انہیں یاد کیا، جبکہ آر جے انوشے اشرف نے پاکستان اور بھارت کے درمیان موسیقی کے رشتے پر بات کرتے ہوئے کہا کہ فن کو سرحدوں، اجازت ناموں یا سیاست کی ضرورت نہیں ہوتی، یہ خود لوگوں کے دلوں میں جگہ بنا لیتا ہے۔
An incredible artist. An unmatched voice. Pure versatility.
Asha Bhosle G’s work will continue to inspire generations.
Such voices don’t fade with time. They become a part of it. Rest in peace. pic.twitter.com/rwZ8Pecksp
— Ali Zafar (@AliZafarsays) April 12, 2026
انہوں نے مزید کہا کہ مشترکہ موسیقی ہی وہ واحد چیز ہے جسے دونوں ممالک کے لوگ یکساں طور پر سراہتے ہیں اور شاید یہی چیز دنیا میں امن کے پیغام کو فروغ دے سکتی ہے۔
ادھر آشا بھوسلے کے انتقال پر اظہارِ افسوس کا سلسلہ تاحال جاری ہے اور جیسے جیسے لوگ اس خبر سے آگاہ ہو رہے ہیں، مزید تعزیتی پیغامات سامنے آ رہے ہیں۔
