پریس انفارمیشن ڈیپارٹمنٹ نے اسلام آباد مذاکرات کے دوسرے راؤنڈ کے حوالے سے فارن میڈیا کے لیے ایکریڈیشن اور پاس کے اجرا سے متعلق نئی ہدایات جاری کر دی ہیں۔ ہدایت نامے میں واضح کیا گیا ہے کہ پہلے سے رجسٹرڈ صحافیوں کو دوبارہ درخواست دینے کی ضرورت نہیں ہوگی، جبکہ نئے درخواست دہندگان کے لیے ادارہ جاتی تصدیق لازمی قرار دی گئی ہے۔
یہ بھی پڑھیں:ترکیہ میں اہم سفارتی سرگرمیاں: وزیراعظم شہباز شریف اور حاقان فیدان کی ملاقات، امریکا ایران امن معاہدے کی کوششیں تیز
جاری ہدایات کے مطابق وہ صحافی جو پہلے ہی اسلام آباد ٹاکس کے ایکریڈیشن پاس کے لیے رجسٹرڈ ہیں، انہیں دوبارہ ڈیٹا جمع کرانے کی ضرورت نہیں ہے۔ ان صحافیوں کو آئندہ مرحلے اور طریقہ کار سے متعلق باقاعدہ طور پر آگاہ کیا جائے گا۔
نئے درخواست دہندگان کے لیے شرط عائد کی گئی ہے کہ وہ پہلی بار پاس کے حصول کے لیے اپنے متعلقہ میڈیا اداروں کے آفیشل لیٹرز کے ساتھ درخواست جمع کرائیں۔
ہدایت نامے میں کہا گیا ہے کہ متعدد غیر ملکی میڈیا اداروں کے ساتھ کام کرنے والے صحافیوں کے بارے میں پریس انفارمیشن ڈیپارٹمنٹ کے ای پی ونگ کے پاس مکمل ریکارڈ موجود نہیں، اس لیے ضروری ہے کہ متعلقہ ادارے اپنے صحافیوں کی تفصیلات براہ راست فراہم کریں تاکہ ان کی باضابطہ رجسٹریشن مکمل کی جا سکے۔
مزید کہا گیا ہے کہ صحافیوں کی سہولت کے لیے متعلقہ افسران ہر وقت دستیاب رہیں گے تاکہ ایکریڈیشن کے عمل کو آسان اور شفاف بنایا جا سکے۔ ای پی ونگ فسیلیٹیشن سیل کے حوالے سے بتایا گیا ہے کہ اس کے مقام اور اوقات کار سے متعلق تفصیلات جلد جاری کی جائیں گی۔
