بانی پی ٹی آئی عمران خان کی اہلیہ بشریٰ بی بی کی طبیعت خرابی کے بعد انہیں نجی اسپتال منتقل کیا گیا جہاں آنکھ کی کامیاب سرجری کے بعد دوبارہ اڈیالہ جیل منتقل کر دیا گیا، جبکہ اہلِ خانہ کو بھی ان سے ملاقات کی اجازت دے دی گئی۔
راولپنڈی میں ذرائع کے مطابق بشریٰ بی بی نے دائیں آنکھ کی بینائی متاثر ہونے کی شکایت کی جس پر اڈیالہ جیل انتظامیہ نے فوری طور پر ماہرین امراض چشم سے ان کا معائنہ کرایا۔ طبی معائنے کے دوران دائیں آنکھ میں ریٹینل ڈیٹچمنٹ کی تشخیص ہوئی، جس کے بعد ڈاکٹرز نے فوری سرجری کا مشورہ دیا۔
یہ بھی پڑھیں:بشریٰ بی بی کو علاج کے لیے اسپتال منتقل کرنے کی تصدیق
ذرائع کے مطابق 16 اپریل کی شام بشریٰ بی بی کو راولپنڈی کے ایک نجی اسپتال منتقل کیا گیا جہاں سرجری سے قبل تمام ضروری طبی ٹیسٹ اور معائنے مکمل کیے گئے۔ بعد ازاں مریضہ کی رضامندی کے بعد پروفیسر ڈاکٹر ندیم قریشی اور ان کی ٹیم نے سرجری انجام دی۔
سرجری کامیاب ہونے کے بعد بشریٰ بی بی کو ایک رات اسپتال میں زیر نگرانی رکھا گیا، جس کے بعد انہیں ڈسچارج کرکے دوبارہ اڈیالہ جیل منتقل کر دیا گیا۔
دوسری جانب جیل ذرائع کے مطابق بشریٰ بی بی کی فیملی ملاقات کے لیے اڈیالہ جیل پہنچی جنہیں ملاقات کی اجازت دے دی گئی۔ ملاقات کرنے والوں میں ان کی بھابی مہرالنساء، بیٹی مہرالنساء مانیکا، بیٹی مبشرہ شیخ اور داماد محمد شیخ شامل تھے۔
ذرائع کے مطابق بشریٰ بی بی سے ان کی بیٹیوں اور بہن کی ملاقات بھی کرادی گئی جو ایک گھنٹے سے زائد جاری رہی۔
