چیئرمین پبلک اکاؤنٹس کمیٹی (پی اے سی) نور عالم خان نے کہا کہ 9 مئی کو ملک دشمنوں نے فوجی تنصیبات پر حملہ کیا، اس کی بھرپور مذمّت کرتے ہیں، ان واقعات میں ملوث افراد کو سخت سزا دینی چاہیے، حکومت اور پولیس کو چاہیے کہ ان حملوں کے سرغنہ کو بھی گرفتار کیا جائے۔ پولیس معصوم لوگوں کو گرفتار کر رہی ہے لیکن سرغنہ کو کوئی گرفتار نہیں کر رہا ہے۔
پبلک اکاؤنٹس کمیٹی کے اجلاس میں نور عالم خان نے ندیم افضل چن کے 85 سالہ والد کی گرفتاری کا نوٹس لیتے ہوئے افضل چن کی گرفتاری قانون اور انسانی حقوق کی خلاف ورزی قرار دیا، جبکہ وفاقی سیکرٹری داخلہ، چیف سیکرٹری اور آئی جی پنجاب سے گرفتاری پر 3 دن میں رپورٹ طلب کی ہے۔
چیئرمین پی اے سی نے کہا کہ 85 سالہ افضل چن کا سیاست سے کوئی تعلق نہیں ہے۔ وہ 9 مئی کے واقعے اور ریاست مخالف سرگرمیوں میں بھی ملوث نہیں، ایسے شخص کی گرفتاری کی بھر پور مذمّت کرتے ہیں۔ نور عالم خان نے کہا کہ ندیم افضل چن کے والد چل پھر بھی نہیں سکتے، پولیس نے گرفتار کرکے انہیں ہراساں کیا اور ان کی بےعزتی کی گئی۔ انہوں نے وزیراعظم سے اس گرفتاری پر نوٹس لینے کا مطالبہ کیا۔ چیئرمین پی اے سی نے کہا کہ ورکرز کو حملوں پر اکسانے والے کو کیوں نہیں گرفتار کیا جا رہا۔
چیئرمین پی اے سی نور عالم خان نے خیبر پختونخوا پولیس کی کارکردگی پر بھی سوال اٹھاتے ہوئے کہا کہ ویڈیوز میں دیکھا جا سکتا ہے کہ 9 مئی واقعات میں کون کون ملوث ہے؟ پھر بھی ملزمان کو گرفتار نہیں کیا جا رہا ہے۔ نور عالم خان نے ریڈیو پاکستان اور پشاور قلعہ پر حملہ کرنے والوں کو فوری گرفتار کرنے کا مطالبہ بھی کیا۔
