معروف لکھاری اور ہدایت کار خلیل الرحمان قمر کے صاحبزادے اور اداکار دراب خلیل نے واضح کیا ہے کہ ان کے والد سے جڑے تنازعات کا ان کے اپنے اداکاری کے کیریئر پر کوئی منفی اثر نہیں پڑا کیونکہ وہ اپنے کام اور والد کی شخصیت کو دو الگ چیزیں سمجھتے ہیں۔
یہ بھی پڑھیں: خلیل الرحمان قمر کی نامناسب ویڈیو کیس، عدالت نے بڑا فیصلہ سنادیا
ایک حالیہ انٹرویو میں گفتگو کرتے ہوئے انہوں نے بتایا کہ انڈسٹری میں آنے سے پہلے ہی لوگ ان کے والد کے بارے میں جانتے تھے لیکن انہیں کبھی اس بات کا خوف یا پریشانی نہیں ہوئی کہ والد کے حوالے سے ہونے والی تنقید ان کے مستقبل کے لیے رکاوٹ بنے گی۔
دراب خلیل کے مطابق وہ ان موضوعات پر بحث سے گریز کرتے ہیں اور ان کا ماننا ہے کہ بطور لکھاری ان کے والد بہترین مکالمے لکھتے ہیں اور اپنے پیشہ ورانہ شعبے میں بہت کامیاب ہیں۔
یہ بھی پڑھیں: اداکار نعمان اعجاز نے خلیل الرحمان قمر کے مخالف بیانات پر کیا جواب دیا؟
دراب خلیل نے اپنے والد کی شخصیت کے ایک مختلف پہلو پر روشنی ڈالتے ہوئے کہا کہ ٹیلی ویژن پر نظر آنے والے عکس کے برعکس وہ نجی زندگی میں ایک نہایت شفیق اور پیارے انسان ہیں اور ان کا اپنے والد سے اختلاف کرنا یا انہیں کچھ برا کہنا ان کی نظر میں بے ادبی کے زمرے میں آتا ہے۔
انہوں نے اس بات کا اعتراف بھی کیا کہ لوگوں کی جانب سے کی جانے والی باتیں تکلیف دہ ہوتی ہیں جس کی وجہ سے خلیل الرحمان قمر اب کسی حد تک خاموش ہو گئے ہیں، تاہم ان کے چاہنے والے آج بھی ان سے محبت کرتے ہیں اور ان کے ساتھ کام کرنے کے خواہشمند ہیں۔
یہ بھی پڑھیں: خلیل الرحمان قمر کا ڈرامہ ’میرے پاس تم ہو‘ کس فلم کی نقل ہے؟
دراب خلیل ان دنوں ڈرامہ سیریل ‘صرف شبانہ’ میں اپنی اداکاری کے جوہر دکھا رہے ہیں جبکہ اس سے قبل وہ اپنے والد کے لکھے ہوئے ڈرامے ‘میں منٹو نہیں ہوں’ میں بھی اہم کردار ادا کرچکے ہیں۔
