وزیراعظم آزاد کشمیر فیصل ممتاز راٹھور نے ڈیجیٹل اینڈ سوشل میڈیا جرنلسٹس ایسوسی ایشن کے عہدیداران سے حلف لے لیا ہے، حلف برداری کی تقریب ایوان وزیراعظم مظفرآباد میں منعقد ہوئی جس میں وزرائے حکومت، چیئرمین آزاد جموں و کشمیر پریس فاؤنڈیشن، صدر سینٹرل پریس کلب مظفرآباد، سینئر صحافیوں و دیگر نے شرکت کی۔
یہ بھی پڑھیں: ہیلتھ کارڈ کا اجرا، طلبہ یونین کی بحالی، آزاد کشمیر کابینہ نے اہم فیصلوں کی منظوری دے دی
اس موقع پر وزیر اعظم آزاد کشمیر فیصل ممتاز راٹھور نے کہا کہ سوشل اینڈ ڈیجیٹل میڈیا ابلاغ کا مؤثر ترین ذریعہ ہے، لائیو اسٹریم میڈیا اور پرنٹ میڈیا بھی صارفین تک پہنچنے کے لیے سوشل میڈیا پلیٹ فارمز کا استعمال کرتے ہیں، سوشل میڈیا پر فیک نیوز کے پھیلنے کے امکانات زیادہ ہیں جہاں صارفین بیک وقت خبر کے قاری بھی ہیں اور تخلیق کار بھی ہیں۔
’کوئی بھی غیر ذمہ دارانہ خبر دشمن کو پروپیگنڈا کرنے کا جواز فراہم کرتی ہے‘
انہوں نے کہا کہ آزاد کشمیر حساس خطہ ہے اور یہاں سے کوئی بھی غیر ذمہ دارانہ خبر دشمن کو پروپیگنڈا کرنے کا جواز فراہم کرتی ہے، صحافی، نوجوان ڈیجیٹل میڈیا پلیٹ فارمز کو فیک نیوز کے پھیلاؤ کی روک تھام اور سوشل میڈیا کو تعمیری اور قومی مفاد کے لیے استعمال کریں۔
انہوں نے کہا کہ بغیر تحقیق کے افواہ سازی اور سنسنی خیز خبریں اگرچہ تیزی سے پھیلتی ہیں لیکن ان کا اثر دیرپا نہیں ہوتا۔ وزیراعظم آزاد کشمیر نے کہا کہ پاکستان پیپلز پارٹی نے 6 ماہ کی مختصر حکومت کے دوران عوامی مسائل کو فوری حل کرنے کی کوشش کی ہے بالخصوص صحافیوں کے مسائل کو ترجیحی بنیادوں پر حل کیا ہے۔
یہ بھی پڑھیں: وزیر اعظم پاکستان کے دورہ مظفرآباد پر صحافی سراپا احتجاج کیوں؟
وزیراعظم آزاد کشمیر فیصل ممتاز راٹھور نے سوشل اینڈ ڈیجیٹل میڈیا جرنلسٹس ایسوسی ایشن کے لیے 10 لاکھ روپے کا اعلان کیا، انہوں نے فیک نیوز کے پھیلاؤ کی روک تھام اور سوشل میڈیا کے مؤثر استعمال کے لیے سوشل اینڈ ڈیجیٹل میڈیا پالیسی بنانے کا اعلان کرتے ہوئے کہا کہ نہ صرف صحافت اور سیاست کے پلیٹ فارمز سے بلکہ ہر شعبے کے افراد نے مل کر معاشرے کی ترقی اور عوام کی فلاح و بہبود کے لیے ذمہ داری کے ساتھ کام کرنا ہے۔
ہر فرد کا اپنا ایک کردار ہے اگر ہم سب مل کر انفرادی طور پر معاشرے کے لیے اپنی ذمہ داریوں کا احساس کریں گے تو خطہ ترقی کرے گا۔
