پاکستان میں تعینات ایرانی سفیر رضا امیری مقدم نے وزیراعظم شہباز شریف اور فیلڈ مارشل عاصم منیر کے کردار کو سراہتے ہوئے کہا ہے کہ جنگ کے خاتمے کے لیے پاکستان کی قیادت کی کوششیں قابل تحسین ہیں۔
اپنے ایک بیان میں ایرانی سفیر نے حکومتِ پاکستان، مسلح افواج اور عوام کا شکریہ ادا کیا۔
انہوں نے کہا کہ ایرانی وفد کے دورے کے دوران سیکیورٹی، منصوبہ بندی اور انتظامات بہترین رہے، جو پاکستانی اداروں کی پیشہ ورانہ صلاحیتوں کا مظہر ہیں۔
انہوں نے وزیراعظم شہباز شریف اور فیلڈ مارشل عاصم منیر کی قیادت میں کی جانے والی امن کوششوں کو سراہتے ہوئے کہا کہ ان اقدامات نے خطے میں کشیدگی کم کرنے میں اہم کردار ادا کیا۔
ایرانی سفیر نے پاک فوج، سیکیورٹی فورسز، پولیس اور دیگر سرکاری اداروں کے عملے کا خصوصی شکریہ ادا کیا، جبکہ اسلام آباد کے شہریوں کی مہمان نوازی اور تعاون کو بھی قابل قدر قرار دیا۔
انہوں نے پاکستان کو برادر، قریبی دوست اور ہمسایہ ملک قرار دیتے ہوئے دونوں ممالک کے درمیان تعلقات کو مزید مضبوط بنانے کے عزم کا اعادہ بھی کیا۔
