بالی ووڈ کے معروف اداکار عامر خان کا کہنا ہے کہ وہ اس وقت اپنی گرل فرینڈ گوری سپراٹ کے ساتھ خود کو ’مکمل‘ محسوس کرتے ہیں۔
ایک انٹرویو کے دوران انہوں نے کہا کہ ’میں بہت خوش قسمت ہوں کہ میری ملاقات گوری سے ہوئی اور ہمارا رشتہ شروع ہوا۔ وہ بہت اچھی ہیں، میں ان کے ساتھ سکون محسوس کرتا ہوں۔ اگرچہ میرا رشتہ (سابقہ بیویوں) کرن راؤ اور رینہ دیتہ کے ساتھ بھی بہت گہرا تھا، لیکن وہ چل نہ سکا۔ اب مجھے لگتا ہے کہ میں بہت خوش نصیب ہوں کہ گوری میری زندگی میں آئیں۔ ہم ایک ساتھ بہت خوش ہیں۔ مجھے لگتا ہے کہ اب جا کر میں مکمل ہوا ہوں۔‘
یہ بھی پڑھیں: شراب نوشی کیوں شروع کی، عامر خان کا چونکا دینے والا انکشاف
ان کا مزید کہنا تھا کہ ’میں جیسا ہوں ویسا ہوں۔ ہر انسان اپنی زندگی میں غلطیاں کرتا ہے کوئی بھی کامل نہیں ہوتا۔ اگر آپ اپنی غلطی کو سمجھیں اور قبول کریں تو اس سے آپ چھوٹے نہیں ہوتے۔ میں بھی اپنی زندگی اور غلطیوں سے سیکھ رہا ہوں۔ میں ہمیشہ کوشش کروں گا کہ وہ غلطیاں دوبارہ نہ دہراؤں اور ایک بہتر انسان اور اداکار بنوں۔ یہ تب ہی ممکن ہے جب میں اپنی غلطیوں کو سمجھوں اور مانوں۔ میں بہت سیدھا سادہ انسان ہوں جو محسوس کرتا ہوں وہ کہہ دیتا ہوں‘۔
مزید بات کرتے ہوئے عامر خان نے اپنی زندگی کی سب سے بڑی غلطی کا ذکر کرتے ہوئے کہا کہ وہ ایک غلطی جسے میں اب درست کرنے کی کوشش کر رہا ہوں وہ یہ ہے کہ میں نے اپنے قریبی لوگوں اور رشتوں کو وقت نہیں دیا۔ میں 30-35 سال تک صرف کام، فلم سازی اور اداکاری کا عادی رہا۔ کووڈ کے دوران مجھے اپنی زندگی پر دوبارہ غور کرنے کا موقع ملا۔ اس وقت میں کام نہیں کر پا رہا تھا تب مجھے احساس ہوا کہ میں نے بہت کچھ کھو دیا ہے اور یہ وقت واپس نہیں آئے گا۔
یہ بھی پڑھیں: میں پہلے ہی گوری کے ساتھ شادی شدہ ہوں، عامر خان کا اعتراف
واضح رہے کہ عامر خان کی پہلی شادی رینا دتہ سے ہوئی تھی، جن سے ان کے دو بچے ایرا اور جنید ہیں۔ 2002 میں ان کی علیحدگی ہوگئی۔ بعد میں انہوں نے 2005 میں کرن راؤ سے شادی کی لیکن 2021 میں دونوں الگ ہوگئے۔ تاہم وہ اپنے بیٹے آزاد کی مشترکہ پرورش کر رہے ہیں۔
