سوشل میڈیا اب محض تفریح کا ذریعہ نہیں رہا بلکہ ایک طاقتور سرچ انجن کی شکل اختیار کر چکا ہے، مئی 2026 کے حالیہ اعداد و شمار کے مطابق امریکا میں 49 فیصد صارفین معلومات کی تلاش کے لیے ٹک ٹاک کا استعمال کر رہے ہیں۔
یہ بھی پڑھیں: ٹک ٹاک اور یوٹیوب کریئیٹرز کو ماہانہ 3 ہزار ڈالر دینے کا اعلان
اس تبدیلی کا سب سے نمایاں اثر نسلِ نو یعنی ‘جنریشن زی میں دیکھا گیا ہے جہاں تقریباً 65 فیصد نوجوان گوگل کو چھوڑ کر ٹک ٹاک پر اے آئی کوڈنگ ٹولز سے لے کر کھانے پینے کے مقامات تک ہر چیز تلاش کر رہے ہیں۔
انفلوئنسرز اب ماضی کی طرح ہیش ٹیگز کی بھرمار کرنے کے بجائے سوشل سرچ انجن آپٹیمائزیشن پر توجہ دے رہے ہیں۔ اس طریقہ کار میں ویڈیو کے اسکرپٹ، اسکرین پر لکھے گئے ٹیکسٹ اور کیپشنز میں قدرتی طور پر کلیدی الفاظ شامل کیے جاتے ہیں تاکہ مواد آسانی سے تلاش کیا جاسکے۔
ماہرین کے مطابق ٹک ٹاک کا نیا نظام اب واچ ٹائم، انگیجمنٹ اور اس بات پر زیادہ توجہ دیتا ہے کہ آپ کی ویڈیو صارف کی تلاش سے کتنی مطابقت رکھتی ہے۔
یہ بھی پڑھیں: طلبہ کو ہم جماعتوں سے جوڑنے کے لیے ٹک ٹاک کا نیا فیچر ’کیمپس ویریفکیشن‘ متعارف
انسٹاگرام نے بھی اس رجحان کو اپناتے ہوئے پوسٹس پر ہیش ٹیگز کی تعداد محدود کرنے کی سفارش کی ہے تاکہ اسپیم کو روکا جا سکے اور مواد کی دریافت کو بہتر بنایا جائے۔
انسٹاگرام کے سربراہ ایڈم موسیری نے بھی اشارہ دیا ہے کہ اب ہیش ٹیگز ریچ حاصل کرنے کا بنیادی ذریعہ نہیں رہے۔ جدید دور کے مواد تخلیق کرنے والوں کے لیے اب یہ اصول واضح ہوچکا ہے کہ اگر ان کی ویڈیو سرچ کے قابل نہیں ہے تو اسے دیکھا جانا بھی مشکل ہوجائے گا۔
