آزاد کشمیر کے دارالحکومت مظفرآباد میں معرکہ حق کی کامیابی کا ایک سال مکمل ہونے پر یومِ تشکر منانے کی تیاریاں عروج پر پہنچ گئی ہیں۔
مظفرآباد میں 6 مئی کو آپریشن بنیان مرصوص کی پہلی سالگرہ منائی جائے گی، جس کی مرکزی تقریب نڑول اسٹیڈیم میں منعقد کی جائےگی۔ اس موقع پر اسٹیڈیم کو قومی پرچموں سے سجا دیا گیا ہے۔
تقریب میں نامور گلوکاروں اور قومی کرکٹرز کی شرکت متوقع ہے، جبکہ اعلیٰ حکومتی شخصیات بھی شریک ہوں گی۔ اس دوران قومی ہیروز کو شاندار خراجِ تحسین پیش کیا جائے گا۔
تقریب میں معروف فنکار علی عظمت، آئمہ بیگ اور دیگر اپنی آواز کا جادو جگائیں گے۔
شہر بھر میں بینرز، پینا فلیکس اور سائن بورڈز آویزاں کر دیے گئے ہیں، جس کے باعث مظفرآباد میں جشن کا سماں ہے اور عوام میں جوش و خروش پایا جاتا ہے۔
تقریب کے دوران قومی یکجہتی اور حب الوطنی کا بھرپور اظہار بھی کیا جائے گا۔
