راولپنڈی میں لین دین کے تنازعے پر 2 نوجوانوں کے قتل کے معاملے میں اہم پیش رفت سامنے آئی ہے، جہاں پوسٹ مارٹم رپورٹ کے دوران مقتول زین شاہ کے جسم پر بہیمانہ تشدد کے نشانات کی تصدیق ہوگئی ہے۔
اسپتال ذرائع کے مطابق زین شاہ کے جسم پر تشدد کے علاوہ گھسیٹنے جیسی خراشوں کے نشانات بھی پائے گئے ہیں۔
پولیس کا کہنا ہے کہ راولپنڈی کے علاقے پیر مہر علی شاہ ٹاؤن میں مقتول زین شاہ کی موت تشدد کے نتیجے میں واقع ہوئی۔
یہ بھی پڑھیں: راولپنڈی: بہانے سے پاکستان بلوائی گئی خاتون کا غیرت کے نام پر قتل
پولیس کے مطابق دوہرے قتل کا یہ واقعہ 8 مئی بروز جمعہ پیش آیا تھا۔
ابتدائی تحقیقات کے مطابق فریقین کے درمیان لین دین کے تنازعے پر جھگڑا ہوا، جس دوران فائرنگ کے نتیجے میں نوجوان سراج گولی لگنے سے جاں بحق ہوگیا۔
پولیس کا کہنا ہے کہ سراج کے قتل کے بعد اس کے عزیز و اقارب اور دوستوں نے زین شاہ کو پکڑ کر انسانیت سوز تشدد کا نشانہ بنایا، جس سے وہ جانبر نہ ہوسکا۔
مزید پڑھیں: راولپنڈی: بہن کا گلا کاٹ کر قتل اور شیر خوار بھانجے کو زخمی کرنے کا مقدمہ درج
پولیس کے مطابق مقتول سراج کے قتل کا مقدمہ اس کے والد کی مدعیت میں درج کرلیا گیا ہے، جبکہ مدعی نے فائرنگ کا الزام مقتول زین شاہ کے دوست عون چودھری پر عائد کیا ہے۔
ادھر زین شاہ پر تشدد اور قتل کے الزام میں 8 ملزمان کو تحویل میں لے لیا گیا ہے، تاہم مرکزی ملزمان تاحال روپوش ہیں جن کی گرفتاری کے لیے چھاپے مارے جارہے ہیں۔
پولیس کا کہنا ہے کہ واقعے کی مختلف پہلوؤں سے تحقیقات جاری ہیں۔
